حلاوة روح

واحشنى التدوين أوى كل اما اجى اكتب ألاقى انى مش هضيف ارجع اكسل تانى ووحشنى كل الناس اللى بيحبونى واللى بيرخموا عليا لأنهم برده بيحبونى المرة دى بقى قلت لازم أكتب أحكى عن اللى فات وحلاوة الروح بتاع 2009 وكمان نرغى عن 2010 يااااااااه لا بجد الكتابه وحشتنى..................

2009 مع انى محبتهاش كشكل حتى بصوا لاسمها كدا تلاقوه رخم بس كانت من أكتر السنين اللى هفضل أفتكرها طول عمرى

بدأت العمل الاجتماعى وحسيت بسعاده كنت مفتقدها بجد من حفلات خيريه لمراكز الأيتام للمسنين وكمان امسيات الشعر واكتشفت اننا عندنا عباقرة خاصة الناس الجديده عندهم روح تجديد غير عاديه والمزيكا اللى هيا حياتى أصلا والسياسه اللى أضافتلى كتير أوى أوى

عرفت أجدع شباب وعمرى ما أنساهم ولا أنسى كل شخصية أثرت فيا ازاى اتعاملت مع انواع جديده من الناس وحبيتهم بجد جدا جدا..

وبعد كدا دخلت فى مود التنمية البشريه بطريقة عمليه دا بعد الاهتمام النظرى بيه من كتب وفيديوهات ونظمنا أمسيه للدكتور إبراهيم الفقى عندنا فى المنصوره وكان الموضوع رائع من حيث المبدأ ان شباب ينظموا حاجة زى دى والدكتور ابراهيم اللى بيلف العالم يشيد بيها وكمان اننا استفدنا كتير اوى من الطريقة والعمل الجماعى وكمان حصلى حاجه أفضل انى احكى عنها بطريقة غير مباشره بس هو احساس مفاجىء زى ما تقولوا كدا حاجة حلوة اوى اوى أضافتلى كتير ومبسوط بيها أوى اوى ....................

فى أخر السنه حاسس انى كبرت مش عارف ليه يمكن عشان أصحابى اتخرجوا يمكن عشان بدأت احس انى المفروض اشتغل بقى عيب عليا وكفايه تعليم يمكن لأنى احتياجاتى زادت وحسيت انه لازم انا اللى اعملها لنفسى عيب ان حد يعملى بقى يمكن عشان أحلامى زادت وبتكبر يوم بعد التانى او يمكن عشان أنا فعلا نفسى بجد أعتمد على نفسى بطريقة كاملة الله أعلم على اى حال نفسى اخلص بقى

2010 متفائل بيها جدا جدا الحمد لله حتى شكلها حلو كدا طبعا هتقولوا ايه الهبل بس بجد بحب الأرقام البسيطة دى مع ان الكل بيقول اللى جاى أصعب لا انا حاسس ان اللى جاى أسهل وأفضل ان شاء الله بخطط أسافر أماكن كتير السنة الجايه ان شاء الله أقربهم شرم والغردقة وبتمنى الأقصر وأسوان عامل ترتيب للسنة كدا يارب يمشى زى مانا عايز أو على الأقل اقرب للى انا عايزه .....

هنبدأ كلنا بتفاؤل صح.........

هنعيش سنة نحقق فيها أحلامنا.......

لازم يكون عندنا قوة الامل دايما هيا اللى تدفعنا..........

لازم نرتب أفكارنا كويس أوى احنا عايزين ايه ؟؟؟........

نحب بعض أوى أوى اخواتنا اصحابنا الناس اللى فى الشارع ونظهرلهم الحب د............ا

نسعى للخير لان متعة عمل الخير نفسها هيا دفعة للامام............

ننسى اللى فات بكل مافيها ونسامح كل اللى غلط فينا............

لا نتذكر الماضى الا للاستفاده من اخطائنا أو الضحك على مواقفنا ولا مجال للحسرة والندم..........

نشوف المستقبل دايما بطريقة متفائلة حذرة مرتبة واقعيه تملك جزء من التغيير..........

لازم يبقى للترفيه جزء من حياتنا لان التغيير دائما من أسس النجاح..............

نفرح وننبسط وندى لكل حاجة وقتها ونعرف اننا عايشين حياة واحده بس.............

الواد مانووو صدعكم صح أقول لكل الناس كل سنة وانتو طيبين ويارب سنة كلها حب علينا جميعا

وسامحونى رغيت كتير بس أعمل ايه كل دا جوايا طبعا ميرضيش حد انى اشيله لوحدى

بحبكم جدا جدا جدا

وعندى فكرة صغيره كل اللى هيرد ممكن يحكى زى مانا حكيت كدا واللى مش عايز عادى خلاص

ماااااااااااااااااااااااااااااااااااانوووووووووووووووو

حالة خاصة

يمشى الخيال الى طموحات قادرة على تغيير التاريخ فاعيش حالة التفاؤل التى ليس لها مثيل هو تفاؤل التحضير وتفاؤل النجاح الذى صوره خيالى فى لحظة تفكير وبعد نشوة النجاح التى اعيشها.......

اتصدم..... ان عندى ميد ترم قريب ايه دا انا لسة بدرس انا لسة ادامى سنة انا مين انا فين يقولولى فوق يامضروب بقى وعيش الواقع اقولهم طيب مانا عايز اخلى دا واقع يقولولى خلص الهم اللى انت فيه الأول نيلة عليك وعلى دا جيل فاسد مش مقدرين النعمة اللى انتو فيها.

وبعد فاصل تحطيم الامال لا اجد امامى الا حالة واحدة هيا حزن واحساس بالعجز نظر للبيئة المحيطة من مجتمع سلبى وروتينى وغير متقبل للتغيير اعيش هذه الحالة فى حالة صمت اسمع للناس واتعجب لاحلام اصدقائى واتعجب لحلم التقدم واتعجب ايضا كيف يعيش هؤلاء الناس كيف لا يسمعون ولا يعيشون تلك حالة الحزن التى لا تصل لليأس هيا حزن فقط ..........

اكتشف...... ان الحياة كدا كدا ماشية انا مبسوط انا برقص انا بعيط الحياة بتجرى ومش هتستنى افكر ابقى مبسوط ولا حزين وان اللى عايز يعمل حاجة بيعملها على كلمتين تنمية بشرية والنجاح والتفاؤل استعيد حالة النشاط بمنطق احنا عايشين عايشين يبقى ليه نعيش خانقيني نفسنا لما ممكن نقضيها مبسوطين وخلاص.

ونظرا لجرعة التفاؤل الزايدة عن الحد التى ممكن ان تصل بى الى اللامبالاة ابدا فى الاستيقاظ من اندماج الحالات واحاول الوصول الى حالة استقرار نفسى تتماشى مع الطبيعة الانسانية للمجتمع المحيط وهيا بالتعامل مع كل موقف على قد حاجته وان يكو التفكير الدائم هو الاهم المهم وانا قاعد مسقر نفسيا بقى والحياة فل ترجعلى تانى احلامى وطموحاتى اللى مش ممكن انساها ابدا وارجع افكر فيها بالخطوات لانى مقتنع تامام انها ممكن تغير تاريخ كامل كل واحد ورايه بقى واما جتلى الطموحات والامال تانى قلت ياااااااه لسة هنكرر التجربة وافرح واحزن وغيره وغيره لا لا انا ادخل انام احسن خلى الجو يروق لدماغى ويرتاح من التفكير خالص.

ونمت ومعتقد انى هسترخى تماما بدون تفكير تخيلوا ايه اللى يحصل يجيلى التاكيد للحالة اللى المفروض اكون فيها هيا حالة التفاؤل استعداد لتحقيق الاحلام وتظنيشا لكل واحد بيحاول يوقعنى او لاى حد معتقد انى غلط او لاى حد فاكر انى بطلب انى اعمل المستحيل فى أحلامى بس برده الاحلام لازم ارتبها وادرسها صح واعرف وقتها امتى عشان مرجعش تانى اقع فى كل الحاجات اللى فاتت دى....

ومن هنا نكتشف ان الواد مانوووو عمل موضوع كبير عشان كان مضايق شوية.............
بس فعلا ارتحت شوية طول عمرى أقول الكتابة دى ملجاى الوحيد.............
يلا بقى اسيبكم على خير مع التخاريف بتاعتى دى ولو حد فهمها يفهمنى انا رايح انام عشان احلم بالطموحات..............

............. ماااااااااانوووووو ..............

6 أكتوبر تستحق الفخر

محمد العباسى

راجل بسيط جدا لابس جلابية وقاعد يتكلم بطبيعة المصريين اللى ملهاش مثيل فى اى مكان فى العالم

هو اول من رفع علم مصر على أرض سيناء وبيحكى عن جو الحرب ياشباب

عارف ان ناس من اللى بيقراوا هيقولوا ايه دا انت لسة بتفكر فى الحرب ايه دا دانت مش بيس خالص احنا عايزين نعيش ياعمنا ونخرج ومنهم اللى هيرد ويقولى فعلا احنا كنا كويسين لمجرد انه عايز يرد وخلاص انا بس هطلب منكم تفكروا للحظة فى الكلمة دى

...احنا عدينا الخط الذى تحدت بيه اسرائيل العالم وقالت انه لو المصريين سخروا كل طاقتهم مش هيقدروا احنا عديناه بأبسط شىء طلمبات ميه........

احنا فاكرين كلمة احنا يعنى مجموعة يعنى الجيش دا كله يهمه يرجع بلده لانها تستحق منه أكتر من كدا بكتير

بيقول الحاج محمد العباسى انه مكنش خايف وهوا واقف وسط النار وبيرفع علم فاهمين الفكرة عارف انه ممكن يموت فىا ى لحظة

بس عادى جدا هوا رايح يموت الراجل زعلان انه ماماتش شهيد تخيلوا شكل البلد كان عامل ازاى اياميها بيقول كنا كلنا طاقة وسمعت

من احد الجنود التانيين برده انه بيقول لو كانوا قالولنا نرجع مش هنرجع شايفين الثقة شايفين الحماس وعلى فكرة مكنش حد فيهم

منتظر علاوة من الحكومة ولا كادر دول كانوا بيعملوا كدا بدافع اسمى من كل دا الدافع اللى بيخلى اى واحد فينا يسمع اسم مصر قلبه يتهز

بقول الكلام دا ليه صح عشان احنا لازم نفكر لازم نعرف ماضينا كويس لازم نعرف ان خطة حرب اكتوبر من اعظم خطط الحرب على مستوى العالم ولا جبنا خبراء اجانب ولا بياعين من الصين احنا بعقولنا والله فضينا المستشفيات وتوهنا الراى العام العالمى وفاجئنا الدنيا كلها بأقوى جهاز مخابرات انا والله بتكلم عنا لمصريين احنا نقدر...............

احنا نقدر نفيد البلد دلوقتى احنا نقدر نعمل اللى عمل الحرب الشعب بحماسه واللى رجع سيناء حماس جنودها واللى هيرجع مصر لقيمتها احنا برده كل واحد فى مجاله وبس كفايانا نوم نتعلم من ماضينا ونركز فى حاضرنا هنوصل هنوصل هما كانوا بيقولوا كدا واحنا كمان لازم نقول كدا البلد دى ملهاش غيرنا كفاية اللى هربوا منها احنا مش عايزين نهرب

مش عارف بس عايز اقولها وخلاص انا بعشق تراب البلد دى مهما حصلى فيها ومهما حصلنا كلنا انا بحبها لأنى مفيش اطيب من أهلها ولا ليا بيت تانى غير هنا..............

مش هقولكم وجعت دماغكم ولا حاجة لأن الكلام دا واجب عليا اقوله وواجب عليكم تسمعوه يلا اخوكم المشاغب :: مااااااانووووو

.......مغلق من التعليقات ..............

العيد والأنطلاق

وحشتووووووووووووونى بجد كل سنة وانتم طيبين وحشنى التدوين بس انتو عارفين بقى فترة رمضان بتبقى هادية اوى

وروحانيات اكتر وياااااارب تقبل منا جميعا واغفر لنا وارحمنا اى نعم الواحد مكنش مندمج اوى السنة بس مش مشكلة تتعوض ان

شاء الله العيد جه وهناكل بقى قال يعنى مكناش بناكل فى رمضان ان شاء الله العيد يبقى بداية لانطلاقة السنة الدراسية والعملية

والحياة عموما ايه الكلام الكبير دا انا جاى اقول كل سنة وانتو طيبين يارب ايام خير عليكم كلكم وتخرجوا وتتفسحوا وتعملوا كل حاجة

وان شاء الله نرجع لحالة التدوين الجميلة يلا بقى عشان متتأخروش ومبقاش رخم اكتر من كدا

تحياتى اخوكم المشاغب :::::::::مانوووووووووووووووووووو

التسامح سمة الأقوياء

فى أمسية للمحاضر العالمى وخبير التنمية البشرية الدكتور ابراهيم الفقى أصل عقبال عندكم كنا منظمينله أمسية من يومين هنا فى المنصورة كان عنوانها المفاتيح العشرة للنجاح بس لفت نظرى وهوا بيتكلم عن التسامح وان القلب اللى مش بيسامح هو أسوأ أنواع القلوب تقريبا كان اللفظ كدا على ما أذكر............

الفكرة ان الانسان اللى بيسامح بيمد العالم بطاقة حب وتسامح ومن قوانين العقل الباطن قانون الانعكاس ان الحاجة اللى بتطلعها للعالم الخارجى بترجعلك بنفس قيمتها طلعت حب هيرجع حب طلعت كره هيرجع كره وكان فى كلمة لغاندى ان( التسامح سمة الأقوياء) ليه بقى لأن الانسان اللى بيسامح بيبعد نفسه عن التفكير السلبى فى الاشخاص وكمان ميشغلش باله لانه اكبر من كدا بيسامح وخلاص وبكدا الموضوع ينتهى........................

ايه الكلام الكبير اللى انا بقوله دا شكل الواد طلع مثقف ولا ايه المهم ندخل فى الموضوع الرئيسى وطبعا مينفعش نتكلم عن حاجة غيره:::

الأول نتفق اننا هنسامح ونحب ......

هندعى ونتوسل لله ومننساش ندعى لكل اللى بنحبهم

نروح نصالح اى حد مخاصمينه

خيركم من يبدأ بالسلام

هنبتسم فى وجه الناس كلها

ههذر مع الاطفال واساعدهم

هنحاول نروح دار ايتام او مكفوفين

نحاول نساهم ولو بقدر بسيط فى شنط رمضان

نحاول نعمل افطار الطريق

هنطلع للناس حب وخير عشان يرجعلنا تانى

نتعامل بمبادىء الإسلام مش هنجيب حاجة من برا

طبعا كلنا هنعمل كدا عشان رمضان بس ليه ياجماعة منخليش السنة كلها رمضان هوا شهر نخليه 12 شهر وتبقى عدت السنة

نتعامل بنفس المنطق مع كل اللى حوالينا الناس فى الشارع فى المواصلات البياع فى المحل الدكتور المهندس كلنا نبدا حياتنا بابتسامة

نبدأ وقتنا مع اى حد بابتسامة نعيش بالتفكير الايجابى دا بيضايقنى يبقى اكيد فى حاجة مضايقاه لان الحياة مشاكل وكل واحد فيه اللى مكفيه مش أول اما واحد يعلى ا لصوته التانى يبقى منتظر انه يمسك فى خناقه...........

هنتطبع بطباع المسلم فى رمضان ونقضى كل فروضنا وزيادة كمان احنا فى اجازة ومفيش حد وراه حاجة وان شاء الله لينا وقفة بعد رمضان نعرف احنا كلنا وصلنا لايه

انا حبيت اقولكم كل سنة وانتو طيبين بس بطريقة مختلفة شوية يارب فعلا اكون قدرت افيد حد ويااااااااارب ايام خير عليكو جميعا

وقللوا فى الحلويات بلاش ناكل علطول كدا الاكل مش هيطير الخير كدا كدا بيبقى كتير كتروا من الفاكهة وبلاش ناكل ادام التليفزيون

واشغلوا النهار باى حاجة مفيدة ويارب يوفقنا جميعا

اللهم تقبل صيامنا وصلاتنا وركوعنا وسجودنا واجعل القران شفاء لصدورنا يارب أمين............

تقبلوا تحيات اخوكم المشاغب :::: ماااااااااااااااانووووووووو

ومتنسوش تدعولى بالله عليكو...............

وحشتنى بقى وخلاص

اه والله بجد بقالى كتير كل اما اجى اكتب الاقى دماغى واقفة عن التكفير وحاسس انى مش هقدم جديد ارجع تانى

انما النهاردة بجد وحشتنى الكتابة جدا قلت هكتب وخلاص والناس هتفهمنى وتقدر حتى لو انا مش مقدم جديد اوى يعنى وكمان لسة مخلص بريزون بريك لاول مرة فى حياتى والحلقة الأخير أثرت فيا أوى وفكرتنى بأيام الأحاسيس والمشاعر والروح الصافية وخاصة اخر مشهد اللى فكرنى بالحب بمعناه اللى زى الفل بقى مش الحب بمعنى صاحبتى وماما عادى وبابا عادى

من اول الطفولة بنمر باحاسيس حلوة وأحاسيس وحشة كتيييييييييير مش عارف ليه ليا مزاج أتكلم عن الحاجات الحلوة بس اه اصل احيانا اما نتجاهل الشىء ممكن يموت....................

*************************************************

احساسنا بلعبة كنت بشوفها فى المحل او بتمناها فى خيالى ومرة واحد لقيتها عندى البيت وانا قاعد العب بيها واكسر ها فى الأخر

بس احساس حلو بالضبط زى احساس البنت الصغيرة بالحنان تجاه عروستها وانها تقعد تنيمها وتكلمها وتسرحلها شعرها.

احساسى أما أخرج مع ماما مثلا برا المنطقة اللى انا فيها وتتعامل معايا على انى راجل كبير مع العلم انها لسة جايبالى ذرة مشوى لأنها عارفة انى بموت فيه لكن فىا لاخر حاسس بالفخر انى راجل كبير ماشى معاها.

احساسى باول يوم مدرسة وانا كنت بعيط لكن اول اما حسيت بالراحة وسط الاولاد بدات العب وأجرى وانبسط ومش عايز أروح منها للبيت كمان لانى حاسس ان البيت هيرجعنى طفل تانى مع انى بقيت حد عاقل فى أول سنة من الدراسة فى حياتى بالضبط زى احساسى فى لحظة تفوق والكل جاى يهنى وانا مبسوووووووط عشان انا متميز وكمان مبسوط عشان هحس انى كبرت أكتر أصل بدأت امسك فلوس فى ايدى حلاوة النجاح من ماما وبابا.

احساسى وانا فى الكافيه مع أصحابى وكنا صغيرين بس عرفنا بقى الكافيهات وبدأت اشرب شيشة مع انى عارف انها غلط بس عايش لحظة المتعة بتاعتها وحنا بنهذر ونضحك وبناكل ومبسوطين جدا وناسيين اننا عندنا دراسة لوا غيره اهم حاجة عندنا مفيش حاجة تفسد اللى احنا فيه.

 

احساسى بالجامعة وانى اسيب أهلى واقعد لوحدى حسيت بالحرية بقى ورحت مكان جديد واصحاب جديدة وبخرج واسهر وكل يوم فى مكان وعايش الحياة اللى اى حد يتمناه فلوس بتتحول وانا بصرف هوا غلط بس حاسس باحساس حلو ومبسوط انى بسعد نفسى

احساسى باول موبايل واول بنت كلمتها عليه (كانت اللى اتكلمت عنها فوق) احساسى يوم اما تملكت اللاب توب بتاعى الجديد احساسى وانا بنجح فى الجامعة بعد فترة صعبة فى حياتى احساسى بلحظة على البحر الساعة 6 الصبح فى روقان ومزاج وواحد قهوة مظبوط.

احساسى فى حفلة ايتام او فى دار مسنين او فى قعدة مع مكفوف راحة العمر وانا بعمل الخير احساسى وانا فى الحسين بصلى الفجر وانا فى رمضان بفطر صائم احساسى وانا بجرى وبلعب مع طفل مستنى انه بس يبتسم ومع ام دمعتها فى عنيها على طفلها المريض وخايفة تزلها ادامه احساسى بعد صلاة فجر دعيت ربنا فيها وتوسلت وبكيت احساسى برضى ربى واهلى وسعادة أخواتى وأصحابى.

أحاسيس أحاسيس كتييييييييييير يمكن وقع منى حاجات بس أكيد انا قلت كتير والأجمل احساسى دلوقتى بعد ما اتكلمت وحكيت كل دا ولازم لكنا نبقى عارفين ان مش كل احساسى حلو هييجى بعده كل حاجة حلوة

لأنى مثلا مثال سبت البنت اللى حبيتها 4 سنين.

وسقطت فى هندسة سنتين بسبب احساس أول سنة جامعة .

جبت مجموع منيل فى ا لثانوية بسبب احساس الخروجات والكافيهات.

تعبتكم معايا ومع احاسيسى بس برده هقول كلمة بقولها كل مرة مليش غير هنا أتكلم فيه ولا أحب اتكلم فى اى مكان تانى غير هنا

اتحملونى بقى شوية انا اصلا حاسس انى بتكلم ادامكم كلكم دلوقتى ويلا بقى كفاية لان الساعة خلاص بقت 9 وانا عايز انام شوية

تقبلوا تحياتى اخوكم المشاغب :::: مااااااااااااانوووووووو

جاى أهيس (تحديث)

لولولولولولولولوىلىلىىىىى
انا قلتها متاخر شوية بس كنت مشغول والله سامحونى بقى يلا استعدوووووووووا
انا نجحت نجحت نجحت نجحت نجحت نجحت نجحت نجحت
وبقيت فى 3 خلاص ياناس اصل انا حوارى كبير اوى مع التعليم
المهم الحمد لله على شىء بقى وعقبال البكالوريوس يااااااااارب

***************************************

مع انى مش عارف المعنى الصحيح لكلمة تهييس لكن الأقرب ليها هو انك تكون شخص مهيس يعنى
وحشتوووووونى بجد ووحشتنى المدونة من زمان مكتبتش من يوم عم اوباما ماكان هنا قلت أجى اتراخم عليكوا شوية
وأهه يبقى عيش ورخامة مزاجى حلو ليه ؟ سامع حد بيسال كدا لا والله هوا مش حلو بس انا بحاول اعيشه فى مود استقرار

يعنى عشان أقدر أفكر كويس وكمان كنت فى رحلة صيف عائلية بقالى أسبوع الجو كان حلو فيها برده مش عشان عائلية يعنى ولا
حاجة لا عشان كان ليا اصحاب هناك قابلتهم وكمان كلنا انبسطنا والخروجات كانت على ودنه والاكل كمان من سى فود لبيتزا وكله
جاى وكمان الشيشة الظريفة فى السكرية بعد الأكلة التقيلة (اه اصل انا كنت فى رأس البر) وانا هناك بقى شفت حاجات جديدة فى البلد

انبسطت اوى لأن المكان مش طبيعى مكان ااختلاط مياه النهر ومياه البحر المفروض كلنا نهتم بيه فعلا وبصراحى فى شغل وكل سنة
اماكن جديدة اوى كمان الدمايطة ناس بتحب الشغل جدا شعب فعلا يستحق الأحترام لأنهم بيحبوا بلدهم اوى وكمان مقدرين الخير اللى
فيها وانا هناك بقى كنت بقرأ الجرائد لانى مش بحب اتصل بالعالم الخارجى وانا برا سواء نت او تليفزيون لا الجرائد بس

ولفت نظرى أخبار كتير ........................

اولا شفت ماتش مصر وأمريكا على البحر والجو كان زى الفل بس هما مكانوش زى الفل

عمرو أديب والمنتخب واللى قاله واللى قالوه

استقبال جمهور مصر المحترم للمنتخب

تأكيد الحكم على هشام طلعت مصطفى
تأكيد الحكم على الراجل بتاع تبادل الزوجات

ايران اللى بيحصل فيها وعلطول افتكرت انتخابتنا الجاية ان شاء الله 2011

************************************

بس أنا بصراحة كنت مروق دماغى ومزاجى حلو ورايح جاى على البحر بالليل اتمشى واقعد وكمان اكتشفت مكان رائع هناك بعيد عن

الناس بس حلو أوى مع انى مكنتش عايز اجى من هناك بس برده كل حاجة هنا وحشتنى انا قلت أرغى معاكم يا اولاد وربنا يسهل

ونكتب قريب حاجة كدا تفرفش وتزقطط اصل انا طالبة معايا الأيام دى فرح والبس كلاسيك وأروح مش عارف ليه حد بقى يتجوز يلا او

يعزمنا ولو حتى على مركبة فى نيل القاهرة والراجل يفتح أغانى ونهيص ونعتبره فرح وخلاص

يلا بقى عشان متقولوش الواد مانوووو دا ملل ............................

اه نسيييييييييييت أقول حاجة.......

** انا كملت 21 سنة من فترة كدا يوم 11 فى الشهر دا انا مكنتش فاكر اصلا وكمان كنت فىا لقاهرة فى الفترة دى معرفتش أكتب
حاجة على المدونة يعنى انا كدا وصلت سن الرشد مش بيقولوا كدا برده يعنى ممكن اتجوز عرفى هاهاهاهاهاها اوعوا تصدقوا انا
مليش فى الجواز اصلا اصله صفقة فاشلة تانتاتاتاتتا ............

** وكمان نسيت أقولكم اهم حاجة حصلت فى المصيف دا (موبايلى اتسرق) هههههههههه اه والله من جوا الشقة الساعة 8 الصبح
لولولولىلىلى وانا نايم فى البلكونة والباب مفتوح عامل فيها ناصح بقى ومامن احنا فى مصيف وكل الناس فاتحة الأبواب وبعدين
العمارات مش عالية وكل الناس بتفضل الدور الأرضى عشان اريح وكدا وراااااااح الموبايل

ونقول سلام بقى عشان الحق اخرج وكمان عايز أكل اشوفكم فى المدونة الجاية ورا البنزينة شمال اوعى حد يتاخر

يلا سلام مربع من ام الدنيا مصر

*****************************

أوباما يتألق فى القاهرة

أشهد له بالتألق ايوة تألق لانى كنت حاسس انه رايح يعمل حفلة أصلا

خلال 55 دقيقة تقريبا من الجرعة السياسية التى ذكرتنى بكبار السياسين على مدى التاريخ

بصرف النظر عن اتجاهه او ماقاله ولكن الشهادة حق ولا بد أن تقال

وبدأ بالسلام عليكم ونحسب اول نقطة معانا

تحدث عن فخره باستضافة جامعة الأزهر وجامعة القاهرة له وتحدث عن دور الازهر على مدى التاريخ

تحدث عن دور الحضارة الإسلامية فى تقدم وازدهار بل وابتكار العلوم الجديدة فى كل المجالات وانها مهد الحضارة فىا لغرب حاليا

استشهد من القران 3 مرات تقريبا واستشهد من الانجيل والتوراة

وعن اسباب التوتر بين امريكا والعالم الإسلامى تحدث عن احداث 11 سبتمبر وكما قال انه يريد ان يبدأ بداية جديدة

تحدث اوباما عن الديمقراطية كما طالبته المعرضة المصرية وغيرها

وتحدث عن حقوق المرأة ايضا وحقها فى ا لتعليم وتولى المناصب فى العالم

وعن ايران والملف النووى

الخطاب كان تاريخى كما أراده اوباما

لأنه جعل كل انسان يشعر ان اوباما جاره اوواحد من عندنا خاصة بالوجه السينمائى والجاذبية الخاصة والأسلوب السياسى الخالص

أوباما اظهر للشعب الأمريكى ان المسلمين ليسو ارهابيين وأظهر ان امريكا ليست ضد اللإسلام ودى اكتر حاجة مميزة فى الخطاب بصرف النظر عن النوايا بقى تحدث بطلاقة لمدة كبيرة دا اذهلنى بجد وخلى شوية المقاطيع اللى قاعدين فى الصالة يسقفوا اكتر من 25 مرة سورى انى قلت كقاطيع يعنى هما فهم اقلية محترمة فقط ونكمل بقى بعد كل دا

ولكـــــــــــــــــــــــــــــــن,,,,,,,,,,,,,,,,,,,

قال أوباما أن لليهود حق فى الحياة ولكن نسى انهم يعيشون على حساب الفلسطينيين

ذكر أوباما محرقة اليهود ونسى ان هناك كل يوم محرقة فى فلسطين

تحدث عن الديمقراطية لانه فى مصر ولأنه يعلم ان المعرضة المصرية تريد ذلك ودى محاولة لاحتواء كل من حوله

تحدث عن حرية الأديان لانه فى مصر ولان اقباط المهجر ابلغوه احتجاجهم عن السياسة النظام المصرى عن المراة تحدث نظرا لما يحدث فى مصر والدول العربية من تحديد مقاعد للمراة فىا لبرلمان وغيره

لخصت حاجات بسيطة كدا بس كمان لفت نظرى زيارته للاهرامات وكان كاجوال اوى ومتحرك ماهو 41 سنة ياناس يعنى شباب برده

بس عارفين بشكره والله خلى الناس تبدا تقول ها فين مصر تاهت فين عملنا دعاية بلاش جو احنا مش محتاجين دعاية والحركات دى

لا احنا محتاجين دعاية عشان اللى بيعمله البعدا دلوقتى سوء السمعة خالص....

وأوباما جه وأوباما راح وأوباما قال والكاميرات صورت والناس وقفت واشوارع فضيت ههههههه اه والله القاهرة كانت فاضية

وأحلى كلام يتقال وأحلى ردود افعال من المصريين لانهم اطيب شعب والعالم كله بيبص ويقول دا تاريخى الخطاب

هوا فعلا ظهر انه تاريخى بس دا لانه اتظبت صح مش لأانه فعلا تاريخى وقنوات وصحفيين والمارينز وطائرات وموكب اكتر من 20 عربية والريس صحى بدرى عشاه مخصوص واكل فطير وعسل وطعمية زى مابيقولوا وأحصنة

أنا متفائل بالراجل والله وياريت يكون خير بس هوا مجرد تفاؤل عندى دايما يعنى

السؤال دلوقتى وبعدييييييييييييييييييييييييييييين ؟؟؟؟؟؟؟؟؟؟؟؟؟؟؟؟؟؟؟؟

ثقافة شعب

منقدرش ننكر ان ثقافة ا لشعب اتغيرت مع انى مش فاهم هيا كانت ايه وبقت ايه بس هيا اتغيرت وخلاصبس لو نفتح صفحة الحوادث بعيد الشر يعنى مع انى مش بقراها غير كل فترة تلاقى الحوادث بقت غريبة أوى قتل ب50 طعنة اغتصاب اب لابنتهاللى قطعت جوزها وحطيته فى اكياسمعدش فى سرقة من غير قتل حتى القتل مبقاش زى زمان>>

وهنا هقول كلمة للاستاذ ابراهيم عيسى (أين زمن القتل الرحيم)

طيب بعيدا عن الحوادث نروح لثقافة الزبالة يااااااااه والبلد بتاعتنا بسم الله ماشاء الله انا والله ما أعرف ايه السر فى اننا نرمى الزبالة جنب الصندوق على الأرض طيب مانرميها فى الصندوق ولا مثلا نرميها على الأرض فى مكان تانى حتى يبقى لينا عذر ان مفيش صندوق وهنا

هقول (البلد بلدنا ياناس مش بلد الحكومة يعنى احنا من واجبنا برضه نخاف على نظافتها)

يخربيت اى موبايل بيغنى ويرقص انا كرهت الموبايلات والله العظيم تركب المواصلات تلاقى كل واحد مشغل موبايل شكلواغنية شكل ربنا يرزقهم كلهم ويجيبوا احسن الموبايلات بس منأذيش الناس بقى ياعم هتوجع دماغنا ليه هيا ناقصة لخبطةمعاك سماعات اسمع لوحدك مفيش معاك يبقى متوجعش دماغنا بقى ولا احنا غاويين نقرف بعض وهنا

هقول (الموبايل جاى عشان الاوقات العصيبة مش الاوقات العصبية )

الخلل وصل لثقافة الأدباء والكتاب اللى المفروض انهم بيكونوا رموز الفكر طبعا مش هتكلم عن حاجات كتير بتتكتب وروايات تافهةوسينما مقاولات بدافع اننا فى عصر الحرية ياعم بلا حرية بلا بطاطس ابوس ايديكم وبلاش جو التخدير دااحنا عايزين نفيد البلد يعنى محدش يقولى دا حصل كذا ويسيبنى اقرا المشكلة ويمشى ماتتكلم ياعم تقول رأيك تقدم حل خلونا نساعد بعض فى أننا نحل بقى مش نفضل طول عمرنا نفرح ونشمت فى بعض ونموت فى المشاكل استوقفنى عنوان كتاب (مصر ليست أمى ) للكاتب أسامة غريب قرات الكتاب وعجبنى الأسلوب جدا وعجبنى بعض المواضيع كقارىء ومعجبنيش بعض الحاجات الاخر كمصرى زى عنوان الكتاب اللى بعتبره انه كان مجرد دعايا للكتاب مش أكتر لأن فى حاجة دايما بقولها فى فرق بين مصر بتاريخها وعظمتها ومكانتها وبين حكومة مصر اللى عبارة عن شوية ناس جايين المفروض انهم بينظموا حقوقنا فى البلد يعنى بيشتغلوا عندنا يعنى غلط الأشخاص دول وفسادهم وظلمهم مش بسبب مصر دا بسبب ان اختيارهم غلط اصلا من الاول

انا مش عارف اتكلمت فى المواضيع دى ليه بس بجد مستغرب الغلط عندنا زاد ليه وليه بقينا بنفرح فى بعض وبنشمت

الخطر جاى من جوانب كتير عشوائيات وثأر فى الصعيد وتكتل عائلات فى كل مكان وخناقاتنا بقت بالأسلحة نسينا خناقات

الكلام اللى كانت بتبقى ساعة ونتصالح وخلاص الغلط فين ومن مين ؟؟؟؟؟؟؟؟؟؟؟؟؟؟؟؟؟؟؟

اه صحيح كل اللى قلته فى البوست دا رأيى الشخصى اللى عايز يناقش يناقش الاختلاف دايما مفيد انما اللى عايز (يجادل) يبقى ملوش مكان فى المدونة دى يروح يشوفله حد يتخانق معاه مش طالبة صداع

ومتنسوش ان الامل موجود موجود ومفيش مستحيل نحل كل مشاكلنا بس احنا يكون عندنا النية والعزيمة بس

فاضلى مادتين ادعولى بقى عشان اروح لماريا بعد اما اخلص

دلع دلع دلع ...جوزيه عملها وخلع

شكرا يا أسطورة لا نستطيع أن ننساها

انا عارف انكوا زهقتوا كورة الأيام دى بس بجد خلاص اخر تدوينة رياضية على الأقل الفترة دى

فرحااااااااااااان اوى ومقدرتش اخبى فرحتى مبسووووووووط ياناس والله هطير من الفرحة

قال ايه الزمالك يفوت للاسماعيلى الماتش

والطلائع يحارب عشان يخسر الدورى

الدورى كان صعب أوى السنة دى وكان ممتع وتكتلات اندية وحركات والكل عايز الاهلى يخسر الدورى ولكن

عفوااااااااا............................ الأهلى فوق الجميع

عفواااااا................................. لا يوجد إلا الأهلى

عفوااااا.................................الواقع أن الاهلى هو الأسطورة

الأهلى بطل الدورى للمرة الخامسة على التوالى

مانويل جوزيه وفى بوعده واهدى جمهور الأهلى الدورى

طظ فى الجمهور اللى مبيفهمش كورة وهوا جمهور الزمالك

مليون طظ فى جمهور الاسماعيلى

انا مش بحبهم ودا رأيى وبلاش نقول عيب ومش عيب

انا بكرررررررررررررره جمهور الزمالك والاسماعيلى

لأانى مبحبش قلة الروح الرياضية وقلة الفهم مع احترامى للجميع

خارج من الامتحانا لنهاردة اخر نكد والله شفت الماتش كأنى اخدت الماجستير رقص وهيصة ولعب وهوبااااااااااااااااااااااا

أحلى وأطعم حاجة فى الدنيا أنك تبقى واثق ان جهدك مش هيضيع

ولا فوتنا ماتشات لحد ولا بنرشى حكام ولا بنوصى فرق تانية تلعب بدالنا

أخدنا الدورى برجل اللعيبة

أنا عاااااااااااش للاهلى هذا الفريق المحترم من أكبر شخص الى أصغر شخص

شكرا على استقرار الأدارة

فاروق جعفر....أهلا بك

أولا أرحب بالكابتن العظيم فاروق جعفر الزملكاوى أرحب بيه فى عالم تحدى الاهلى

ولا انسى تصريحك قبل المباراة انك ستهدى الدورى للإسماعيلى بصراحة عشان احنا جمهور اهلاوى ولا هزنا الكلام دا

بس بينى وبينك انا قلت انت هتكسر الدنيا

واقف على الخط ياعم لفاروق ولا كانك انت اللى هتاخد الدورى ياعم روح ياأبو مركز سادس ولا سابع باين ولا انت مش على

الخريطة اصلا ايه ياعم فاورق مش قبل ماتتحدى حد تقدر مدى قوته الأول وموصى اللعيبة تضيع الوقت

والعيال تمشى براحتها كانهم هيخرجوا من الماتش يرفعوا الكاس العظيمة للمركز اللى هما فيه

واوعى فاروق جعفر جاب جون ياجماعة وقاعد على الدكة بيقول هحرق الاهلى هموته انا فايز واحد صفر

واذ ييجى الواد أبو تريكة الجماد اوى دا اللى مطلع عينكم من اول الماتش وهوباااااااااااااااااا

قال عم فاروق كويس خلاص هنتعادل ايييييييييييييييييييييييييه

انت بتلاعب اسمنت السويس ياعم مع احترامى لأسمنت السويس طبعا

الواد فتحى بقى دا مشكلة كارثة ياناس والاول والتانى وهوباااااااااا وفى المقص وارقص يافاروق ارقص

وقايم تعترض على ايه قايم تعترض على ايه ياخيبتها مالملعب ادامك والاهلى اللى انت بتكرهه جنبك

اه صحيح نسيت الواد الجماد أوى اللى بتتريقوا على شعره وهوا بيعمل الكورة هوبااا ساحرة ياناس ويحط التالت محمد طلعت

ولا عزاااااااااااااااااااااااااء للمفوتين (اللى بيلبسوا فانلة بيضا وفيها خطين حمر )

وانتظر ماتش الاسماعيلى اللى بتوقع انه هيكون مستوى لعب رائع وان شاء الله الدورى للأهلى

فاروق حعفر.................أهلا بك فى مركز تحديات الاهلى دا أول درس ومجانا اهه لو عايز كمان عايزك تعلى صوتك وتغلط فى الأهلى أكتر

ملحوظة.....انا اتحدث عن مباراة الأهلى وطلائع الجيش التى انتهت بفوز الأهلى المتوقع 3-1 وفاروق جعفر هوا مدرب طلائع الجيش

الحسين.....مكان السحر

مش عارف والله بس حسيت انى عايز أكتب عنه وخلاص افضفض شويتين بقى واللى عايز يسمع يسمع

واللى مش عايز بقى برده هيسمع ام هند (المهم) بقى..............

الحسين دا بقى من أكتر الأماكن اللى بعشقها فى حياتى ومن اكتر الاماكن اللى بتريحنى فى الدنيا

تلاقونى فجأة كدا قطعت مسافات وعديت بحور وركبت السوبر جيت ومن المنصورة للقاهرة علطول بس عشان أروح الحسين

ياما اتمنيت اعيش هناك فى اى مكان فى حى الازهر حيث الروحانية الخالصة فى كل مكان..................

**********************************

كنت بسأل نفسى دايما ايه اعجاب السياح بالمكان دا طيب احنا فاهمين وكمان المسجد بيمثل حاجة جوانا انما أى حد جاى من برا ومش مسلم ايه اللى بيشده فى المكان دا وكان الجواب فى اخر مرة كنت هناك والجواب انه لا جواب منطقة الحسين لها سحر خاص قادرة على جذب أى شخص مهما كان ودا لاحظته وانا بسمع واحد من السياح أول اما نزل من العربية قال ايه بقى

(woow....very fantastic place)

بصرف النظر عن الكلمة كان نفسى مصر كلها تشوف هوا بيقولها ازاى وقالها أول اما نزل من العربية يعنى لسة مشافش حاجة هوا مجرد حس بالمكان بس ومن هنا عرفت ان الحسين له سحره الخاص لكل الناس

المهم بقى اقولكم بعمل ايه اما بوصل الى أرض السحر ومنطقة الجمال ............

**********************************

لو الواحد جعان بقى يبقى حمام محشى من العهد الجديد واحس ان خلاص الدنيا هتطير بيا لكن ازاى لازم الاول أرز بلبن من عند المالكى اللى حبيت الأرز بلبن مخصوص بسببه

بعد كدا لازم الواحد يتمشى شوية فى جو البخور والعطور والاكسوارات كمان عشان يهضم الأكل ونوصل بقى لفيييييييييين ؟

(الفيشاوى) وما أجمل واحلى وأريح دا مكان وعندك واحد شاى بالنعناع اللى عمرك ماهتشربه فى مكان تانى وواحد شيشة خوخ

بس دى ليا بس منصحش حد يجرب انا اللى هحاول ابطل عشان نبقى زى بعض وقاعدين بقى الناس رايحة وجاية وضحك وهزار

ربنا يديم البسمة بس فعلا كل الناس اللى فىا لحسين بيكونوا مبتسمين دايما طول عمرى بشوفهم كدا...............

*****************************

دلوقتى بقى اللى عايز يروح يروح انا حكيت شوية ساعات من ساعات السحر فى الحسين الخطوة الجاية شوية توقعات كدا لو حد فيكم ربنا كرمه وراح الحسين فى رمضان باليل طبعا اكيد اللى رايح باليل هينتظر لحظة السحور الرائعة وكل الناس بتاكل تقريبا مع بعض والاكل الكتير والجميل والحالة الحلوة نفسها من الروحانية وياسلام ياسيدى لو كان ليك حظ تشوف التنورة مع المزيكا الصوفية انا نفسى بحس انى طاااااااااااااااير بعيد عن الدنيا كلها...................
وروحى بتلف مع التنورة وكأننا كلنا فى فسحة فى ظل المزيكا الصوفية............
كنت عايز أحكى وحكيت ومش عن اى حاجة دا الحسين ياناس والله من أجمل اماكن الدنيا عارف انى طولت وزهقت كل الناس بس اعذرونى بقى مليش مكان غير هنا أرغى فيه..........................
******************************

************************

*****************

الدكتور بيعلمنى أهرب

أنا قلت والله مافى غير المدونة أقول فيها الموضوع دا أصل بجد ضايقنى هتقولوا ايه اللى ضايقك يامانوو سامعكم

ندخل بقى فى الحكاية ..........

كان ياماكان انا رايح الكلية الصبح ودخلت عشان أحضر المحاضرة مع دكتور انا عارف انى مش هفهم حاجة بس عشان الغياب

بقى وقعدت فى المحاضرة والدكتور مقضيها هذار وضحك وقاعد وسطنا ورا وبيتكلم هوا حلو انه يقعد جنبنا بس مش حلو أنه

يفضل طول المحاضرة يرغى فى كلام فاضى المهم بقى ياناس انا بس بحكى الموقف كاملا وتخيلوه كمشهد درامى طويل

الدكتور كان بيتكلم وسمعت ودنى ان ابنه مسافر كندا بعد شهر تمام والدكتور بيقول انه قال لأبنه ::

( لو استقريت هناك مترجعش تانى هنا خالص )

كررها مرتين انا بينى وبينكم سخنت ومقدرتش استنى يقولها ثالث مرة

رحت اذ فجاة مدور وشى وبدا الحوار.......

أنا:: وده صح ياكتور

اتصدم الدكتور لما اكتشف ان فى حد ممكن يرد عليه

الدكتور:: ايه اللى صح ياابنى

أنا :: ان الواحد يبعد عن بلده وميرجعلهاش تانى

الدكتور::لما تكون بلد زى دى اه ميرجعهاش تانى

انا:: يعنى حضرتك بتعلمه انه يهرب بقى من المشاكل اللى فى البلد

الدكتور:: قال لا مش بعلمه يهرب انا بقول يشوف مستقبله ودا من حقه

انا:: طبعا يشوف مستقبله لكن يرجع بلده تانى لانها ليها حق عليه حب الوطن بعد حبه لدينه

الدكتور:: انت شخص بيروقراطى واسكت بقى بس بس

يالهوىىىىىىىى الدكتور بتاعى بيقول عليا بيروقراطى عشان بحب بلدى انا هتجنن والله

حب البلد بقى روتين ياناس حب البلد بقى فى ا لاغانى بس اما الدكتور اللى بيعلمنى يقولى كدا اما احنا الطلبة نعمل ايه

الدكتور اللى اتعلم فى البلد دى وعاش فيها وعشان اخد المنحة 4 سنين من برا بيقول لابنه لو شفت نفسك كويس مترجعش تانى خالص اييييييييييييه خلاص انا هتجنن والله.....................

وقعد الدكتور المحترم يجكيلى عن ال4 سنين اما كان برا وبياخد الدكتوراه وازاى هناك بيحترموا الناس ومش عارف ايه

قعد يقولى عن مساوئ البلد وغيره وغيره وانا مقتنع بكل حاجة وحشة هنا بس مش لدرجة انى اهرب واهاجر واقول بشوف مستقبلى البلد دى ليها حق عليا وقلتله ان لازم اديها جزء من حقها وغلط انى اهرب واسيب كل حاجة ورا ظهرى

لقيته بيقولى دانت مش جاى من غير كشكول ازاى بقى بتقول الكلام دا....................

معرفش ايه العلاقة بس رديت عليه وقلتله اانا جاى من غير كشكول لانى عارف انى مش هستفيد منين انت بتقول لابن حضرتك

ميرجعش ومنين عايزنى اجى بكشكول وانت عراف ان التعليم هنا مش هيفيدنى بس دا برده ملوش علاقة بحب البلد

وكرر الكلمة الشهيرة (بس بس خلاص )...................

قلتله لو حضرتك بتقفل الحوار بالكلمة دى يبقى انا خلاص اقتنعت قدام الناس دى كلها

اما دكتور يقفل نقاش محترم بينه وبين طالب بكلمة (بس بس خلاص)

عايزنى أرد اقوله ايه قلتله وانا هسكت لانه فعلا مينفعش حوار.............

وطبعا قلب الدكتور الوش التانى وعمل فيها دكتور فى الكام دقيقة اللى فاضلين فى المحاضرة ومكلنيش ولا فكر يبصلى مش عارف ليه مع اختلاف الراى بين اى اثنين دا شىء وارد جدا انما طبعا مع الدكتور اللى بيقول حب الوطن بيروقراطية مفيش الكلام دا...........

انا قلت ا للى جوايا لانى بجد مفروس من يوميها ولو انا غلطان فى حاجة حد يقولى والله انا قلت ا لحوار زى ماكان

وان كان حب الوطن بيروقراطية حد يقولى بقى........................

خلاص المدونة بقت( تييييت )

سألونى الناس لا مش بتاع فيروز سألونى الناس ليه غيرت اسم المدونة؟

ولمن لا يعلم فى هذا الزمن ان مدونتى اللذيذة دى كان اسمها ( من هنا وهناك ) اخترته من زمان ودلوقتى طلع معاش البقاء لله

اه اصل بقاله كام شهر لا انا مش زى الحكومة معاشى بعد 60 لا انا كل كام شهر عشان روح الشباب تدخل بيننا وكدا

نرد بقى على الناس اللى سألت

الاسم الجديد (تييييييييت) هو تعبير عن الادب والذوق والاحترام بدل ماتشتم حد او تغلط فيه بكلمة مش ولا بد

تقول تيييييييت وبكده يبقى وجدنا حل مجازى للألفاظ اللى انتشرت الأيام دى

وبما أنى حاربت التعدى على اللغة العربية وحاربت كلمة سيس من قبل فأعلنها انى قررت الاستعانة بكلمة تيت من قاموس الشباب

ومش معنى كدا انى تخليت عن حملتى للبحث عن أصول الكلمات لا ابدا خالص نهائيا

بدليل اننا كلنا نعرف أصل كلمة تيت من التليفزيون اما كان ييجى واحد يذكر اسم قناة تانية غير اللى هوا بيتكلم منها تلاقى التليفزيون

عمل تيييييييت وكمان اما كانوا يقولوا اعلانات عن شركات تاينة تلاقيهم بيقولوا تيييييييييت على اساس ان الشركة مستنية كلمتهم

ماعلينا صدقونى صدقونى ماهى خلاص بقت تيت بقى

المهم اسم المدونة اتغير بجد هوا عاجبنى يارب يعجبكم بقى عشان انبسط وافرفش وازقطط

شاب سيس

ده واد سيس ياعمنا اللى هوا ماسك الجيتار وشايله يعنى على كتفه وماشى

ده عيل سيس اللى هوا مسقط البنطلون لغاية ركبته

اوووووووف ايه الشاب السيس دا اللى واقف بيتكلم مع البنت الجامدة جدا دى فى الكلية

انت هتبقى زى الشباب السيس ولا ايه اللى هما بيعملوا حاجات مايعة زى البنات الواد اللى ماشى باللبانة دا سيس أوى

ولا اللى لابس سلسة سيس برده

ولا الواد اللى اتأخر على صاحبه راح صاحبه قايله دانت عيل سيس

ولا الواد اللى بيتراخم وبيهزر مع أصحابه راحوا يقولوله ماتنجز ياسيس

فى الفيلم بتاع كدا رضا بقى بقوله يعنى ايه سيس قاله زيك كدا ولو تفتكروا كانت شخصية سمسم هادى وطيب وملوش دعوة بحد يعنى

يمكن عكس بعض الحاجات اللى احنا قلناهاطيب ايه بقى ؟؟؟

يعنى ايه سيس ياجدعان الكلمة دى جتلنا منين من اى لغة ولا من أى حروف دى عربى ولاانجليزى دا يامرسى والله بجد انا بسمع

الكلمة وبقولها طبعا مع الموجة وخلاص بس نفسى أعرف مصدرها من اى دولة ولا من أى ثقافة ولو مش عارفيندى تبقى كارثة ولا

كارثة ليه طيب مافى بيس برده وفى كمان الفرانكو اراب ولا فاهمه برده بس اهو موجود ليه بقى عشان اللغة بتاعتنا وحشة ولا شكلها

مش على الموضة ولا بعيدة عن البرستيج وهنوصل فى الأخر للى الفرق بين الاجيال بس دا مش فرق بين الاجيال لانى دى لغة يعنى

من الثوابت زيها زى عاداتنا وتقاليدنا يمكن أنا غلطان برده مش عارف يمكن انا دقة قديمة طيب ازاى وانا مواليد 88 يعنى فى شهر

يعنى بيقولوا عليا شاب يعنى لو حد عرف يبقى قولى والنبى عشان نلحق اللغة دى ولا أنتوا مش معايا ولا ايه

لو موافقين على اليلة دى قولوا برده عادى بس أهم حاجة نوصل للمصدر واهوو كلنا بندور......وربنا يقدرنا ونوصل

يوم 21 فبراير

&&&&&&& يوم الطالب العلمى للغضب فى جامعات مصر &&&&&&&

انطلقوا ياطلاب مصر لا للظلم والاستبداد

لا للحرس الجامعى

لا لزيادة المصروفات

اين دور الجامعة فى الحياة ؟

اين دور الطلاب فى الحياة السياسية كما كان ؟

إلغاء اللائحة الطلابية القائمة ووضع لائحة تعطي الحرية للطلبة

نريد نظام تعليمي متطور يواكب العصرحت يكون معترف بجامعاتنا عالميا

(( وقفة احتجاجية فى جامعة القاهرة يوم السبت 21 فبراير الساعة الواحدة ظهرا وفى كل جامعات مصر وفى جامعة المنصورة خاصة ان شاء الله هنكون متواجدين كلنا ))

قصة يوم 21 فبراير فى التاريخ::

عود تاريخ ذلك اليوم إلي ذكري الأحداث التي مرت بها مصر عام 1946 م حينما أصدرت (اللجنة الوطنية للطلبة والعمال) -والتي

كانت تضم الطلبة المنتمين إلى الحزب الوطني، والوفد، والأحرار الدستوريين، والهيئة السعدية، والكتلة الوفدية، والإخوان المسلمين، ومصر الفتاة وبعض المستقلين- بيانا أعلنت فيه قرارها بأن يكون يوم الخميس 21 فبراير (يوم الجلاء ) ودعت إلي إضراب شامل تقبله المجتمع المصري بكافة أشكاله بقبول حسن فتعطلت الأعمال العامة والمواصلات وأغلقت المحلات التجارية والمصانع ودور العلم في جميع أنحاء البلاد.وشارك طلاب الأزهر في هذه الحملة فخرجت منه مظاهرة كبرى اتجهت إلى ميدان الأوبرا حيث عقد مؤتمر شعبي اتخذت فيه قرارات بمقاطعة المفاوضات وأساليب المساومة والتمسك بالجلاء عن وادي النيل وإلغاء معاهدة 1936.ثم زحفت المظاهرة إلى ميدان قصر النيل حيث الثكنات البريطانية واتجه قسم منها إلى ساحة عابدين وكانت المظاهرات تسير في نظام تام دون اعتداء على أحد ودون التعرض للممتلكات أو جنوح نحو التخريب.. فإذا ببعض السيارات العسكرية البريطانية المسلحة تخترق الميدان وسط الجماهير فجأة لتدهم بعضهم تحت عجلاتها. وحدث صدام بالإسكندرية بين الجنود والمتظاهرين سقط فيه 28 من المتظاهرين قتلى وجُرح 432 متظاهرا وقتل جنديان بريطانيان وجرح أربعة جنود آخرين.وفي هذا اليوم أيضا تمت واقعة فتح كبري عباس الشهيرة حيث قامت قوات الاحتلال الإنجليزي بفتح كوبري عباس والذي يمر علي نهر النيل وذلك أثناء سير جموع الطلاب من فوقه مما أدي إلي وقع عدد كبير من الطلاب في النيل وغرق الكثير منهم.وعلي أثر ذلك أعلنت اللجنة الوطنية للعمال والطلبة يوم 4 مارس 1946 يوما ًللحداد الوطني العام على شهداء 21 فبراير، حيث أعلن الإضراب العام، واحتجبت الصحف، وأغلقت المتاجر والمقاهي والمحال العامة، وأضربت المدارس، وتعطلت المصانع، وزحفت جماهير الإسكندرية كزحف يوم 21 فبراير في القاهرة، واستشهد فيها 28، وجرح 342 متظاهرا ً.

((((((((((((( تحديث ))))))))))))

صور المعرض يوم الاحد 22 فبراير فى جامعة المنصورة:::::

وأخيرا انا مع الكارت الاحمر

أوباما وشبح التغيير

وشفت حفل التنصيب طبعا كعادة الأمريكان النظام لأبعد الحدود وديمقراطية الحضور من الرؤساء السابقين لأمريكا حتى المرشحين

الذين كانوا ضد اوباما فى الانتخابات الرئاسية بصراحة انا كنت مبسوط ومقهور وانا بتفرج بعيد عن كل سياسة أمريكا كلمة

(انتقال السلطة)

ياااااااااااااااااه مأعظم تلك اللحظة انتقال السلطة وبعيدا عما بداخل النفوس لكن مايظهر امام العالم ان الرئيس القديم يودع البيت

الابيض والجديد يحتل المنصب لأربع سنوات قادمة بكل سرور وفرح من الجميع عقبال عندنا يارب لما اشوف اليوم دا قبل مااموت او


جتى يشوفه حد من احفادى ولا احفاد احفادى حتى المهم اليوم ده ييجى فى مصر ولا فى أى دولة عربية كويس برده اهى تبقى

قربت......

كلمة أوباما اللى لم تتجاوز ثلث الساعة وتحدث فيها عن كل تحدياته فى الفترة القادمة ولا يهمنا منها الا انه تحدث عن العالم الاسلامى

وأنه سيقوم بتعديل الطريقة القديمة فى التعامل ويصبح التعامل فى الفترة القادمة عن طريق الحوار المتبادل وان يسحب القوات

الامريكية من العراق ويضمن امن أفغانستان يارب ياسى أوباما تصدق......

كمان قال ان أمريكا ليست بسلاحها ولكن بقيمتها وقال اننا مع اللى يحتاجنا فى العامل منا الفقراء والمحتاجين وكل الناس ولكنه

سيتصدى الى سماهم باعداء امريكا وهم الإرهاب ...........رحل بوش ولا أظن ان هناك من يفقتده لانه رحل وعاره فى يديه كما قال

الرائع فاروق جويدة وتحدث اوباما بكلمات ممكن انا نعتبرها مفيدة وصالحة ونبالغ ونقول سياسته جديدة واذا استمرت من الممكن ان

يتغير العالم ولكن الى الان كله كلام ويبقى التنفيذ والواقع يحكم ياأوباما والأيام بيننا وهنشوف .....................

ملحوظة::::: أحلى حاجة ان الست رايز بتاع الخارجية مشت وجايلنا واحدة زى الفل أمريكانى أصلى( هيلارى كلينتون ) حتى

السحنة فيها تفاؤل شوية أحسن من العصاية اللى فاتت يارب بس تكون بخيرها مش بخير اليهود