2011 عام لا ينسى !!

تخونه حساباته من لا يضعها فى دولاب ذكرياته....

فيها من الفرح والحزن والأمل واليأس فيها من الجنون والعقل والتطرف والالتزام والحيره والتحديد من كل الانواع تصادف وأنت تمشى بين شهورها وتسمع اغانى النصر او صوت القنابل او مزيكا خاصه تحاول ان تصنع حاله لنفسك تنفصل بها عن كل ما يحدث. انها السنه التى حيرت العالم وحدث فيها مالم يتوقعه المنجم فى لحظه روقان
سقوط ديكتاتوريات واعتصامات واحتجاجات تجتاح العالم واقتصاد على وشك أن ينقلب فى العالم كله
عام رحل فيه شخصيات عامه كثيره نتذكر منهم من يرتبط اسمه بالحريه
ونترحم على الباقى لأهم اخواننا فى الانسانيه......

انه العام الذى كانت مصر على شفا كل شىء ولم يحدث الا الان...
على شفا الحريه ومازلنا فى الطريق اليها... على شفا الفتنه وحماها الله
ولكن نخرج من العام بان الشعب عرف طريقه وداق طعم الحريه اللى معروف ان اللى يدوقها مش هسيسبها الا بموته...
رحم الله شهدائنا وشهداء بلاد العزه والكرامه فى ليبيا وسوريا وتونس واليمن وعاش الوطن العربى الحر ....

تغيرت حياتى مع تغير العالم وكان عام جديد عليا بكل ما فيه فانا أتذكره الان كانى اعيش 12 شهرا من الحلم المتواصل عشت الشهر الاول منه فى الثوره وكان كل شىء مختلف كلام الناس صفاتهم طبيعنهم معنى الحب معنى الاتفاق كله كان جديد عليا...
والى الشهر الثانى تمتد الثوره وتتواصل الاختلافات فى التفكير والشخصيات الجديده فكل منهم له من المميزات مايكفى ومن العيوب أيضا ما يكفى ولكن الكل يحاول ان يتعايش...

وكان الشهر الثالث هو مشهد التحول فرأيت فيه شخصيه ولأول مره يوم 3-1 وماكان احد يعلم ماهو نتيجه اللقاء ولا نتائجه... وفى نفس الشهر كانت لى مع الحياه 10 أيام من الراحه فى كورسات تنميه ذاتيه كنت أعيش الايام فى حاله مختلفه من الهدوء والتعامل الهادىء مع الاخر وكيفيه تقبله وساعدتنى الراحه على تقبل كل ما كان يحدث على الساحه...

وعن الشهر الرابع انحدث فكان فيه حدثين أحدهما كان لى يد فى تنظيمه وراهنت على نجاحه والحمد لله وصلنا الى درجه نجاح معقوله فقط لأنه كان يقوم على الحب والاخوه والتوافق... اما الحدث الثانى فكان من القدر بدأ باحساس يتملكنى بان هناك انسانه بها شىء مختلف وكان يلازمه احساس الخوف من اى تجربه لا تؤدى الى طريق صحيح وبعد تفكير بصوت عالى وتفكير بصوت منخفض كانت لدى الجرأه أن أصارحها بكل شىء كنت أملك شعور الثقه والفخر والاعجاب والتمكن من أنى أسير فى طريق صحيح وهذا مادفعنى الى الصراحه المطلقه فى أدق التفاصيل...

كت أسأل نفسى أين اختلافها...فكان الرد من داخلى...انه مازال هناك من يستحق الحياه من أجله مازالت هناك شخصيات تحتفظ برونقها وطبيعتها ولم يغير الزمن كما غير البعض وضاعت ألوانه ....
اختلافها فى عقلى هى من كنت انا أبحث عنها رأيت فيها الأدب كما تعلمته من امى والأصل كما تربيت عليه والطبيعه كما خلقت والانوثه كما يجب أن تظهر كل هذا دفعنى اتعامل بثقه انها أحق من فى الكون الذى يؤتمن على بيتى.....

وهنا تتغير الموازين وتتبدل بدون شعور وبدون حساب للوقت ها انا الان أحسب الشهر الثامن منذ الاعجاب الاول... ويستمر ترتيب شهور العام ولكن لم اسير فيه بمفردى هناك من هيا معى على الأقل فى التفكير والتخطيط للمستقبل فى عام 2011 وصلت لاخر سنه جامعه بعد 7 سنين ملل وزهق فى الدراسه اخر سنه حاسس انى عايز اخلص لان عندى اللى بيدفعنى لدا وعندى لإحلامى وطموحاتى اللى بدات تشتعل من تانى وبدات أعيد ترتيبها فى حياتى بعد ما كنت نسيتها ونسيت أنها ممكن تتحقق عادى ...

كان لى فى هذا العام رحلات من الانفصال عن الواقع فى جلسات استرخاء او حالات من المزيكا او سفر الى اى مكان
كان للجنون مساحه كبيره بسبب شخصيات جديده اعرفها وأفكار سريعه ومختلفه ومبهجه
أكبر خناقه حصلتلى مع اقرب صحاب ليا الحمد لله عدت بس كانت جديده عليا
كان لى فى شهر رمضان قسط كبييييييييير من الراحه والاطمئنان
وكانت هناك تجربه جديده مع مرض شخص مقرب اللهم اشفى كل مريض
دموعى فى كل لحظه فى عام 2011 كانت على استعداد فانا بقولها دا أكتر سنه دموعى نزلت فيها بالطريقه دى لأنها كانت دائما باندفاع وبدون توقف
لاول مره فى حياتى أحس اى بفكر بطريقه واقعيه منظمه حتى لو محققش أحلامى أو أفكارى فانا مخططلها كويس وهحاول فيها لأخر نفس

وانا الان على بعد ساعات من 2012 .....
أتمنى من الله أن يمنح الحريه لكل من يطلبها ومن لا يطلبها حتى يشعر بجمالها
أتمنى الحب فى القلب فى البيت فى الشارع اتمنى الحب فى النظره للمسكين ولا تكون الشفقه أتمنى الحب فى الصداقه ولا تكون المصلحه اتمنى الحب فى كل شىء وان نبدأ بحب الله سبحانه وتعالى ...
أتمنى لاهلى الصحه والود يدوم والخير دايما يبقى موجود
اتمنى لاصحابى ربنا مايحرمنى منهم ومحدش يزعل منى ويسامحنى لو زعلته فى يوم

اتمنى لنفسى النجاح واكمل الحياه الجديده اللى بدات معايا فى 2011 وان ربنا يوفقنى مع الانسانه اللى اختارها عقلى وقلبى وانى أكون بالنسبه ليها زى ماهيا بالنسبالى وان ربنا يوفقنا ونصنع الحياه بينا على الحب والامل والرضا ادام ربنا وادام كل الناس ولو كانت الحياه بلا عقبات كان الملل يسودها فما أحلى العقبات التى تجعل الانسان أفضل وما أحلى الثقه عدما تكون متبادله وما أحلى الراحه عندما يرتاح القلب الى انسان ترى الدنيا بعيونه وترى الفرحه فى ضحكته....

الى 2011 بحبك برغم كل اللى حصل فيكى

الى 2012 بحبك من قبل ما أشوفك لانى معرفش اكون غير متفائل :)

تقبلوا احترامى::: محمد فوده

الروح

منذ فتره وانا أبحث فى معنى كلمه الروح مع انها مجرد أحساس ولكنى أحب هذا الإحساس بل أعشقه ।
وعند تفكيرى فى المعانى الأقرب للروح وجدت أن هناك نوعين الاول هو روح الانسان التى هيا ملك لله عز وجل
والثانى هيا الروح ذات الطابع المعنوى فى حياتنا ومنا من يشعر بان احساسه هو روحه ॥
وبين المعنيين لا أعرف ما الصله ومن الممكن أن يكونوا شيئا واحدا وبما أنى مبتدىء فى هذا البحث فلا أستيطع أن احدد العلاقه بينهما.

بعد ذلك قررت ان أتعامل مع الروح على انها ورقة بحث تستحق الجهد على الأقل لارضاء فضولى القاتل..

وعن الروح قال سبحانه وتعالى ( ويسألونك عن الروح قل الروح من أمر ربى وما أوتيتم من العلم إلاقليلا ) صدق الله العظيم

_وعن المعنى الأقرب للروح هى مصطلح ذو طابع دينى فلسفى وانها معنويه غير ملموسه يعنى حاجه كدا زى الأحاسيس والمشاعر ان لم تكن هيا او جزء منها وان فى المعتقدات الدينيه ان النفس هيا عباره عن الروح والجسد معا।

_ والروح عند أفلاطون لها معنى اخر انها عباره عن (العقل والنفس والرغبه) وعند أرسطو قال ان الروح محور رئيسى للوجود ولكن لم يفسر الروح بانها شىء غير ملموس يسكن الجسد وكان مثال السكين هو الأشهر له فى تفسير الروح ....

_ تفسيرات كثيره فى الروح فى كل الأديان والأماكن العلميه ولكن سأترك كل من له تفسير واعود الى نفسى واسألها
لماذا أريد أن اعرف تفسير للروح ؟
أو ماهو احساسى بالروح ؟
وهل يختلف هذا الاحساس من انسان لأخر فيجعله يسأل واخر لا يسأل؟
هل معنى الروح التى تعلو الى السماء عند موت الانسان يرتبط بمعنى الروح التى تسمو بأشياء مثل المشاعر الصادقه والمزيكا والأحاسيس الانسانيه ام ان الروح حقا فى احساسها لها طابع دينى وطابع فلسفى كما هو فى معناها ؟

...... هنا عجز قلمى عن كتابه أى شىء .....
احترامى للجميع ولكل منا أفكار تستحق أن يفكر فيها بصوت عالى ..
... محمد فوده ....

مسافات

من الأرض إلى السماء ومن مكان إلى مكان ومن الناس إلى الناس

كلها مسافات منها البعيد والقريب ومنها ما يضرنا وما ينفعنا
اتحدث عن المسافات بين الناس خاصه لملاحظتى شىء غريب فى هذه الأيام
لاحظت أنه مازال هناك أناس لا يتحكمون فى مشاعرهم ومازال هناك أناس يسيطر عليهم العواطف
يرى غيرى أن هذا شىء مريح ويجعلنا نعيش فى سلام لأننا نتعامل بالعاطفه ولكنى أرى أن لكل مقام مقال بالعاطفه لها وقتها والعقل له وقته
اذا فمن يسيطر عليه او يؤثر عليه سلبيا احساسه بالفشل فى قصه حب أو احساسه بالفشل فى علاقه صداقه او حتى علاقته بالأهل كل هذا فهو انسان لا يفكرالا بعاطفته اذا لا يمكنه أن يستغل الاخطاء فى التعلم منها واضافتها الى قاموس الحياه ......

ماعلاقه كل هذا بالمسافات ؟؟
بعدت المسافه بيننا وبين الخالق سبحانه وتعالى
وبعدت المسافه بيننا وبين أهالينا...او قربت جدا فكلاهما يدمر العلاقه
لم نحدد اطار للمسافات بين الأصدقاء فاختلفت وضاعت فيها كثير من المعانى
قربت المسافات بيننا وبين أشخاص لا يمثلوا إضافه فى الحياه
اختلفت الأولويات فى حياتنا فذهب كل مننا الى مكان يبحث فيه عن المكمل ونسينا أساس الحياه
أنصح نفسى أولا وأنصح كل من يقرأ ثانيا عودوا الى أساس الحياه فى هذا الوقت ترتب المسافات وتتساوى
عودوا الى الاولويات ::::
الله سبحانه وتعالى
الصحه التى منحنى اياها
شخصيتى وتكوينها
أهلى وماذا قدمت لهم
مجتمعى وهل أضيف إليه
عملى وهل أنا جاهز لاكون متميز
وأخير ودائما هو أخر الشىء المال

كل احترمى وتحياتى ::: مانوووو

شباب 6 أبريل المنصوره

صدفه تجمعنا بالأشياء التى من الممكن بعد ذلك ان تصبح كيانا خاصا يمثل حياة كامله بداخل حياتنا الأصليه

9-1-2009 فى هذا اليوم وفى صدفه من صدف الزمن التى لم ولن تتكرر شفتهم فى معرض عادى جدا مبهر فى روحه وبسيط فى امكانياته حضنتنى ضحكتهم كلهم وحضنى حبهم واقتناعهم بالفكره كنت حاسس انى عايز اعمل اى حاجه اخرج طاقتى فاكر انها وقت

وهتعدى وازهق زى اى حاجه بعملها كملت وكنت كل وم بيزيد حبى وتمسكى بالكيان والاسم حركه شباب 6 ابريل المنصوره

شباب بيحب مصر بجد _اجدع شباب وبنات فى بر مصر_ من حق جيلنا يجرب اما ان ينجح او يقدم تجربه يتعلم منها الاجيال القادمه

كل دى كلمات بترن فى ودنى عمرى ما نسيتها ولا هنساها كانوا شباب غير التفاؤل عندهم مش عند حد فى الكون علمونى احب لدى ازاى وبأى طريقه....................

سألت نفسى بعد فتره سياسه انا اتشغل فى السياسه ازاى وليه وعشان ايه وكان الرد من جوايا دول مش سياسه دول ناس بتحب بلدها

دا مقياس مختلف تماما للسياسه دا حب وروح أمل وتفاؤل كان هدفنا العام (اسقاط النظام عن طريق التغيير السلمى اللاعنيف)

جنان اه جنان شويه عيال كل يوم مظاهره لا وقفه لا مظاهرات فى الجامعه وبيطالبوا بطرد الحرس الجامعى ايه العيال المجنونه دى

بقيت اظهر ومخافش اقول كلمه فى مظاهره وافتخر فى كل مكان انى 6 ابريل بصراحه اتعلمنا منخافش لاننا كنا مقتنعين ان عمر ما هيحصلنا أكتر من اللى بيحصل......

وفى لحظه جنان منى قررت اوقف كل حاجه واجمد عضويتى لمده كام شهر لظروف خاصه اهتميت بالخروجات والدراسه شويه

ولكن كان ينقصنى الانتماء كنت بحس ان بيوحشنى العائله بتاع 6ابريل المنصوره بيوحشنى حتى احتكاكنا بالامن والظباط وطرق الهروب والحيل لما نعمل معرض جوا الجماعه ولا وقفه فى أى مكان ..................

وفى لحظه عقل قررت ارجع وعرفت اول ما رجعت انى بحب الكيان دا أوى اوى وبحب الناس دى جدا دا غير الفكره اللى كانت متأصله جوايا لانى عايشتها من أول ما بدات فى المنصوره وكانت بعد القاهره بمده مش طويله ومن خالد سعيد لسيد بلال مفرقتش الأحداث دمى بيغلى من ظلم وقهر بتخيل خالد واحد صاحبى وحصله كدا وهو فى كافيه ولانتخابات مجلس شعب حسستنى انى كلب

اه والله فعلا انى مذلول مقيد مش قادر اتحرك برضى بالضرب والظلم والاهانه ومش قادر اعمل حاجه طيب ليه وربنا خلقنى عبد حر.......

وجه يوم 24 بالليل واحنا مع بعض بنكتب البانرات واللوح لتانى يوم بنهذر وبنضحك ومتفائلين وخايفين ومكناش عارفين انها هتبقى كدا بس الحق يقال ان ثوره تونس كانت محسسانا ان فى حاجه مختلفه حتى اما نزلنا الصبح عربيات امن مركزى ماليه الدنيا واحنا بنضحك الحب بينا حلو اوى اوى بيخلينا نتحدى حاجات كتير يمكن كل الناس شايفاها صعبه .........

فى6 أبريل شفت شباب بيفكر بس وشباب بينفذ بس وشباب بيعمل الاثنين.... شفت بنات بميت مليون راجل الوحده فيهم تشيل مظاهره لوحدها الانتماء لكيان والاقتناع بفكرته والحب بين الناس بدون مقابل حب لمجرد الحب فى الله والخوف على بعض كان بيظهر فى كل لحظه اما حد يعتقل ازاى نجرى كلنا لان اخونا جوا اخوات بجد بدون اى مصالح او فى مظاهره ازاى نحمى بعض جمعتنا فكره وهدف نبيل فلابد أن يكون الحب صادق من القلب................

النهارده 10-4-2011 وبعد 4 ايام من احتفالنا بالذكرى الثالثه للحركه واحتفالنا أيضا بالتحول لمنظمه سياسيه شرعيه بعد ما ظللنا ثلاثة سنوات حركه غير شرعيه بالنسبه للنظام الظالم ويعاملونا كما يعاملوا اليهود فى الحروب ويقولون أننا لا نحب بلدنا وأننا ننفذ مخططات غربيه وغيره من الاهانات فى المعتقلات وفى الوقفات والمظاهرات ..............

أين أنتم الان والشرعيه اكتسبناها من الشارع

أين انتم والشرعيه اقتنصناها من مصدر السلطات وهو الشعب

شباب 6 أبريل أفتخر انى فرد من منكم واعتز بانتمائى الذى يواكب اتجاه جيلنا كشباب واتمنى ان تحتفل الأجيال القادمه بالذكرى المائه لمنظمه 6 ابريل السياسيه اتمنى ان يدوم الحب بيننا وان نتحدى الواقع كما نفعل دائما ولأننا اخترنا السياسه طريق يجب أن نعلم أن مصر تحتاج لكل فرد فيها الان وتحتاج لمن يعملون بالسياسه خاصه لكى يحملونها على الاعناق مصر تحتاج دمائنا وليس مجهودنا فقط

فكل شهيد فقدته امه او زوجته يدفعنا لان نصل بها الى الامان والاستقرار حتى لو كنا جميعا لن نشعر به يكفينا فخرا ان يشعر به كل جيل قادم أفضل منا ويستمر فى مسيره الانتماء لبلده .............

الى شباب 6 ابريل المنصوره خاصه يارب يجعل الحب الصادق هو طريقنا للهدف ويجعل انتمائنا لمصر وانتمائنا لكيان الحركه هو الاساس ....عمرى ما هشوف اجدع منكم ولا هشوف أرجل منكم ربنا يجعل شباب مصر كله يشيل همها كدا .....

تحياتى :::: مواطن مصرى ابريلى

ثؤ ومبسوط

الأول ليا ملاحظه كدا من نتائج الثوره المبدعه اللى كل يوم بتقاجئنا بحاجات احنا بصراحه مكناش شايفينها

اسكتوا مش النخبه طلعوا جهلاء اه والله هيا دى النتيجه اللى بقول عليها لاحظوا كدا نخبه المجتمع زى ما بيقولوا عليهم طلعوا من الجهلاء

فى كل المجالات الصحفيه والإعلاميه والسياسيه حتى الدستوريه أو القانونيه وطلع ان فى نخبه كانت عندنا بس مسخبيه لاحظوا كدا مين اللى بيتكلموا فى كل مكان دلوقتى ناس جديده على الساحه وانا بعتبر هو دا فعلا التغيير مش عايزين الوجوه اللى كانت بتدعى العلم والثقافه وكانو بيزهقونا كلام وجت الثوره وضحتهم

المهم بقى انا مبسوط ليه من الوضع دلوقتى لأننا شعب بجد شعب بياخد حقه الناس بتقول أه وناش تانيه بتقول لا واللى مش عارف بيسأل

واللى عارف بيشرح نقاش بجد وكل واحد متأكد انه ليه صوت ولأول مره متأكد أن صوته هيوصل كمان

بقول دا ليه بقى.....لان أنا الايام دى باخد كورس فى القاهره وبقالى أسبوع هنا فى أكتوبر اللعينه حبيبتى راكب مع سواق تاكسى من التاكسيات بنت الناس الحلوه دى اللى تحسسنا أننا بنى ادمين وكالعاده فتحت حوار مع السواق وفاجئنى اه والله بجد انا من كتر المفاجأه سكت وقعدت أسمعهاولا هو زميل وهيقول لأ زيى برده بس مش دى الفكره الفكره انه قعد يتكلم عن كل بند فى الدستور بطريقه احترافيه بجد ومبررات منطقيه جدا وفصاحه وطريقه أكثر رقيا بكتيييير من النخبه اللى قلت عنهم فوق وقعد يشرح الفرق بين عبد الناصر ومبارك والسادات وانا نازل بيقولى البركه فيكم كشباب وربنا يرزقكم الصواب قلتله طول ما عندنا ناس زى حضرتك والله هنبقى أحلى وأحلى ....

سواق تانى بقى ودا أتكلم معايا عن مشكله المرور ولسكان القاهره أكيد شايفين الدنيا عاملين ازاى الأيام دى

المهم الراجل دا قعد يشرحلى ازاى نحل المرور بطرق بسيطه وبعض التعديلات فى الكبارى اللى طلعنا بيها من عصر النظام اللى فات

والله الراجل دا يمسك وزير النقل بدون مبالغه كل اللى قاله منطقى وطبيعى وحاجات بسيطه بس كل الحكايه انها عايزه واحد بيفكر بمزاج زيه كدا

فى الاخر بقى هقول ومتفائل وهفضل متفائل اذذا كنت فى عز جبروت النظام اللى فات كنت متفائل دلوقتى لازم اكون أكتر

احنا جايين ان شاء الله وجايين بروحنا جايين بانتمائنا نقدر نخليها من بلاد العالم الأول عندى رأى ان مصر بخلاف اى بلد تانيه الحضاره هتبقى فيها حضاره بجد احنا مش محتاجين فلوس عشان نعمل حضاره احنا محتاجين الناس دى محتاجين السواق وعامل النظافه والنجار والسباك والعامل فى المصنع لو كل واحد فى مكانه بدا بشغله خلاص احنا وصلنا

تعيش مصر حره تعيش مصر لشعبها تعيش مصر عروسه فى عيون العالم يعيش شعب مصر خير أجناد الأرض

يلا بقى كفايه كدا هبقى اقولكم عن الكورس اللى اخدته هو تنميه بشريه بس حاجه تحفه كدا وجه فى وقته فعلا

عن الثوره...أتحدث

مش عارف ليه النهارده حاسس انه أول يوم بعد الثوره

يعنى النهارده نقدر نفكر وماذا بعد الثوره ؟؟

نقدر نقول على الدكتور عصام حكومة انتقاليه ونفكر بقى فى التحاور لحل امن الدوله والإفراج عن المعتقلين

ونقول رئاسيه ولا برلمان الاول يعنى تفكير بجد بقى وكمان نقدر نكتب تأريخ للثوره فى مكتباتنا وكتبنا

وكمان بقى نفتكر الهتافات اللى كنا بنقولها واللى طلعها المصريين منين بجد مش عارف ولا ازاى

هيا جت كدا فى دماغى افتكر الهتافات هكتبهم اللى عنده حاجه مش موجوده يقول...

الشعب يريد اسقاط النظام

دا هتاف للتاريخ ولكل ثوره تيجى بعدنا تاخده وتبدا بيه طبعا كان فى كمان محاكمه النظام ومحاكمه الرئيس

بااااااااطل

أظن أنه هيبقى من أشهر هتافات الثورات عموما حاجه كدا كانت طالعه من القلب والميزه انه كان بيبقى لايق على كل ظالم

يامبارك يامبارك السعوديه فى انتظارك

ياسوزان قولى للبيه هو متبت فيها كدا ليه

ياسوزان قولي للبيه ... ربع قرن كفايه عليه

ياجمال قول لأبوك شعب مصر بيكرهوك

دا طبعا حاجات كانت خاصه للعائله الكريمه

ااااااااااه ااااااااااه يابلدنا ياتكيه ياوسيه لجمال والحرميه ولصاحب الضربه الجويه (مع الطبله بقى)

هو مبارك عايز ايه عايز الشعب يبوس رجليه لا يامبارك مش هنبوس بكره الشعب عليك هيدوس

ارحل يعنى امشى أصله مبيفهمشى

يلي فاضلك 6 شهور خد أجرتهم يلا وغور

ارحل ارحل يا حبيب ارحل يا وزير التعذيب

عز ياخاربها غور يلا وسيبها

هما بياكلوا حمام وبط ... وكل الشعب جاء له الضغط

ياحريه فينك فينك أمن الدوله بينا وبينك

شدى حيلك يابلد الحريه بتتولد

يا حمام طير طير ... قتلوا اخوانا في التحرير

اعتصام اعتصام..حتى يسقط النظام

وأخيرا

اسمعونى أيها الساده

استمدوا قوتكم من الشعب ونعلم انه لو كنتم خونه لحدث انقلابكم من ثانى يوم للتنحى

ولكن ان تسمعونا دا اهم شىء فى الفتره الحاليه وأن تنفذوا فهذا هو الواجب

لا يمكن ان نسمح لحكمه أقسمت اليمين اما الرئيس المخلوع

ولا لوزراء كانوا ضد الثوره أن يحكمونى فى هذه الفتره تحديدا

لانها الثوره التى وصفتوها بانها أعظم ثوره فى تاريخ مصر

فلا يجب ان نستهزأ بها أو نعتبرها لعبه وتتهى فى اى وقت

الثوره تمحى ما قبلها والشرعيه هيا شرعيه الثوره انتو أعقل وأكيد بتفهموا كلامنا بسرعه

داحنا كانت مشكلتنا مع الحيوانات البائسه اللى مشيت انهم كانوا بيفهموا متأخر دا لو فهموا

فى ايديكم تحلوها وتبقوا رموز زى ما كنتم دايما وفى ايديكم نبقى فى مواجهه ودا شىء مش فارق مع بنى ادمين زينا

احنا مش اى حد دا وصف الشعب المصرى الشعب دا مش شعب عادى ولا شعب غبى واذا كان صبر زمان

هو دلوقتى انفجر يعنى كل طاقتنا طالعه

ركزوا معايا ياساده مبادئنا الان

ان لم نحصل على الحريه فلنموت فى سبيلها

ان لم نحصل على الحريه فلنموت فى سبيلها

ان لم نحصل على الحريه فلنموت فى سبيلها

أقصد الحريه التى نريدها لا التى يريدها أى شعب أو يقبلها أى شعب أخر

واذا فى حد بيلمح ليكم او حد بينادى عليكم فمفيش أقوى مننا

ولا حد هينفعكم الا احنا ببساطه كدا لانكم اما تحبوا تتصرفوا فى حاجه هتيجوا تكلموا صاحب البيت

مش هتورحوا لحد كان بيشتغل فيه وكمان طالع بفضيحه

مازال احترامى للقوات المسلحه موجود ولكن ....الشرعيه هى الثوره

اقاله حكومه شفيق وتشكيل حكومه رموز وطنيه

الغاء الطوارىء والافراج عن المعتقلين السياسين

وتسيبونا بقى نفرح ونطمن وننام ونؤرخ للثوره بتاعتنا

افرحى ياحبيبتى(تعديل)

كتبت البوست اللى دا قبل انتصارنا ودلوقتى بعدله عشان اضيف شويه فرحه هحاول اطلعها

حسيت انى عايز أتكلم لانى لغايه الان دموعى لسه منزلتش حابب اتكلم وانا بتنفس حريه

ياااااااااااااه طعمها حلو بجد والله احساسها رائع ياشهدائها دمكم حرر غيركم

دمكم فى رقبتنا وقى قلوبنا شرف شهادتكم على جبين كل مصرى ليوم الدين

عارفه عايز ارغى معاكى بقالكى كتيييييير حاسس انى مش قادر حتى ابص فى عينك

عارفه انا بحبك وقفوا وقالولى هتنزل مظاهرات حد لسه بيعمل كدا كالعاده مركزتش وهما مالهم

انا بحبك مكنتش عارف انها هتبقى ثوره نحقق بيها كل اهدافنا بس بقت كدا لاننا كلنا نازلين وعايزينك

عايزين كل حاجه فيكى ترجعلنا زهقنا نقول اصلاحات زهقنا نشوف الدنيا بتتقدم حوالينا وانتى ياحبيبتى خنقوكى

كل يوم فى ال 17 يوم اكتشفت مصر جديده ومصريين اجدد

أنتى أحلى وحده فى الدنيا أنتى يتعملك الأبراج والحضاره والناس

كنت بحس بيكى وانتى بتعيطى من كل حاجه وحشه بتتقال عليكى والله ياما ضربت نفسى ميت جزمه انا ازاى مش عارف ارد

انا ازاى مش قادر ادافع عنك

حسيت بحضنك وانا بهتف وصوتى بيعلى وبقول ياحريه فينك فينك امن الدوله بينا وبينك

شفت صوره الشهداء وانا بحتفل كان نفسى يبقوا معانا ماهما زيهم زينا واكيد كانوا بيتمنوا اليوم دا

بس اكيد هما فى مكان احلى ربنا يرحمهم جميعا....عارفه ياحبيبتى كان نفسى يشوفوا تحيه الجيش ليهم

التحيه اللى معملهاش اكبر حد فى الدوله وكان معتبر الشهداء دول زيهم زى اى حد بيموت فى مستشفى ولا على طريق

احترامى وتقديرى للمصرى ظابط الجيش اللى نزلت دمعتى لما شفت تحيته

احلى ابتسامه شفتها على وشك لما انتصرنا وبدأتى صباحك بالحريه شفتى ابتسامتك واحنا فى وسط القنابل المسيره للدموع بس

بنضحك شفتى ابتسامتك والشباب فى التحرير بيغنوا ويضحكوا ويقولوا شعر اصل ثورتنا من غير دم

احنا على ايدك اتعلمنا ننكت فى وسط الهم عشان نقدر نحل

اتدلعى واستعدى للفرح عايز ضحكتك توصل لاخر الدنيا عايزك تقولى انا ملكه انا الدنيا فى ايدى لان كل اولادى بيضحوا عشانى

كل اولادى بيقولوا للعالم تانى احنا فعلا خير أجناد الأرض كل أولادى قالوا للعالم اتعلموا نوع جديد من حريه الشعوب

متعيطيش اوعى عشان خاطرى انتى اللى علمتينا نصبر وانتى اللى علمتينا ان الحق راجع راجع طالما صاحبه بيطالب بيه

مبحبش اشوفك وانتى بتدمعى بعشق ابتسامتك مع أصوات الأحرار من اولادك

هنعمر فيكى ونبنى ونفشل وننجح بس مش مشكله اهم حاجه هنبقى حاسين اننا احرار بنختار كل حاجه

وبنقول على الغلط لا وكرامتنا مش هتتهان وتانى قولى لأولاك اوعوا تهينوا الكرامه تانى

بلاش نقبل رشوه تانى بلاش احنا حصلنا على العزه مناعه العزه رجعتلنا وهتفضل لاخر الزمان

هنقعد ونحقق معاكى كل حاجه اصلا حاجه وحشه اننا نروح نعمل حضاره لبلد تانيه والله مش عنصريه بس حبى ليكى بيخلينى دايما اقول ان كل حاجه المفروض تبقى ليكى

فيكى كل حاجه حلوه انتى عزتى وكرامتى واملى وحياتى وفرحى وحزنى ورقصى وجنونى واهلى وناسى واصحابى فيكى راحتى وتعبى فيكى روحى لو خرجت اموت وراها

ملقتش غيرك اوجهله كلامى بس بصراحه لانى من زماااااااااااان اوى كنت مسكوف أتكلم معاكى دلوقتى يعنى جالى عين اتكلم شويه

بحبك

أنا من القله المندسه

أنا مصرى

أعتز انى من جيل البنطلون الساقط وأفتخر انى من جيل الفيس بوك

جيل به بنات أرجل من رجاله كتيييييييير أوى وفيه ولاد بيحبوا بلدهم بجد

انا من القله المندسه يا ايها الحزب الواطى الديمقراطى

أنا من العملاء كما تدعون

أنا شاب مصرى من شباب 25 ابريل ومن شباب عاشق للحريه

شباب فعلوا ما لم يستطيع احد ان يفعله فى 30 عام

نزلنا الشوارع ومات مننا كتيييير وبرده عند هدفنا اللى خلاص باى طريقه من الطرق احنا وصلنا ليه

استفادات كتير من ثوره شباب واصبحت ثوره شعب منها عوده الثقه والروح وعوده قاعده ان الشعب مصدر السلطات

لى عوده ان شاء الله وحكاياتى مع شارع مصر وهو يثور انا خطفت بس شويه وقت مع انى مكنش ليا مزاج اكتب حاجه

بس قلت اهه لازم اكون موجود عما الاحوال تستقر ونرجع تانى نحكى بقى

اه على فكره كل الناس هنا وحشااااااانى جدا

الصوره اللى فوق من ميدان التحرير بس بتاع المنصوره وهى منطقه المحافظه

برفانك بيجننى

وانا بتصارع مع نفسى للخروج من حاله البلاهه والتناحه اللى انا فيها الأيام دى ولانى واحد من الناس مقدرش بقى كسلان ولا أقدر أبقى روتينى دماغى بتسرح وتفكر كتير فى كل حاجه بتفكر يمكن اكتر مانا بتنفس مبالغه شويه بس اتحملوا بقى واحد بيحاول ينشظ نفسه المفروض تساعدوه المهم وبعد المقدمه الطويله دى اقولكم على التفكير اللى جه فى بالى من ضمن المواضيع ....

انا الحمد لله يمكن احسن حاسه لسه شغاله فيا كويس هيا حاسه الشم عندى مناخيرى بتلقط بطريقه غريبه عشان كدا كل حاجه تقريبا بتتربط معايا بريحتها

__ يعنى اشم المكرونه اعرف هيا دى اللى احب اكلها ولا لا او النسكافيه اعرف خفيف ولا ثقيل كدا يعنى
ومثلا انى محبش ريحه الخضار وهوا بيتسلق مثلا او احب ريحه الاكل على الفحم

__ نيجى للبرفانات ولأنى بحبها عموما لكن فى برفانات أكرهها جدااااا وهيا
مثلا اللى كان بيحطها المدرسين فى المدرسه
أو برفان بنت كان دايما يبقى منتشر وانا داخل الدرس ايام المدرسه كأنها بتاخد دش بيه
ولا برفان انا استخدمته فى فتره مكنتش حاببها او بيفكرنى بواحد صاحبى رخم

*** ايا كان الحاجات كتير لكن الاهم احساسى بقى لو شميت حاجه من دول ببقى هتجنن هموت واقطع مناخيرى مثلا
اهم حاجه يبعد عنى الماضى دا وميفكرنيش بجو المدرسه وغيره من الحاجات اللى مكنتش بحبها

*** الحاجات التانيه بقى فى الحياه مش البرفانات.........

_زى ريحه الجو فى الشتا مثلا لأنى بصراحه محبش جو البرد والمطر اه مبحبوش هو انا اجرمت يعنى وكمان محبش اللى يقد يقول اه واو مش ممكن انا بموت وامشى فى المطر ياعم اتنيل

_فى بقى ريحه المستشفيات عموما ودى اكيد كلنا بنكرهها لكن بالاخص الادويه ولو فاكرين دوا الكحه بتاع زمان دا اللى كانو يقولولنا دا طعمه حلو جدا وهو أسوأ حاجه ممكن تشرب وريحته بجد مش لذيذه خالص

_وكمان أكره ريحه اى مكان مقفول بيحسسنى بالتشاؤم

*** واما جيت افكر فى الحاجات اللى بحب ريحتها لقيتها اغرب.......

_زى ريحه البنزين والرمل اما يكون عليه ميه وريحه الفواحه بتاع العربية وريحه الشمع وهو بيسيح

_أحب بقى كمان ريحه البهارات والتوابل والبخور فى الحسين والاماكن ومصر الإسلاميه بكل مناطقها

_على عكس الشتا انا بحب كل حاجه تربطنى بالصيف زى الايس كريم مثلا

هههههههههههههههههه لا بس موضوع حلو ان الواحد يكتب الحاجات دى محستش غير دلوقتى ويلا بقى كفايه كدا انا خرجت كل ما يشعر به انفى ولو افتكرت حاجه هقولها فى التعليقات
ومات الكلام
ماااااااانووووو
اه استنوا استنوا الصوره اللى فوق هو برفان بحبه جدا جدا يعنى عشان محدش يتكهن باى حاجه كدا او حاجه كدا

انترنت بلا فتنه

كنت كاتب بوست عن ما حدث فى تونس بس بصراحه بعد ما نزلته مسحته وقلت اعمل حاجه احلى من دا كله

حمله انترنت بلا فتنه يمكن الناس شافت الصوره بتاع الحمله عندى على المدونه

وكمان على الفيس بوك مش هتكلم كتير عنها لانى هحط الفيديوهات والصور وموقع الحمله ان شاء الله

طلب من كل المدونين

لكن اللى بدعيه لكل اصحابى واصدقائى هنا اننا نعمل بوست موحد ونسميه انترنت بلا فتنه ويكون فيه صور الحمله وفيدويهاتها

وندعى كل الناس تعمل كدا وكمان ندخل على الموقع ونسجل اشتراكنا فى الحمله او نبعت صورنا او نقول احنا عملنا ايه

كل واحد يعمل اللى يقدر عليه

ياكل مصرى بيخاف على ا لبلد بلاش ننسى بسرعه الفتنه واجب علينا كشباب نحاصرها واحنا فى البيت من غير ما ننزل الشارع ولا اى حاجه الناس اللى بتشير علىا لفيس والله بشوف حاجات هبله وادينا بنعت لبعض وبنقول تسليه ولكنها كوارث انا دعيت كل اصحابى وهزور مدوناتهم كلهم عشان اقولهم واتمنى اننا كلنا نعمل كدا احنا مش خسرانين حاجه كله واحنا قاعدين هنا على النت

تفاصيل الحمله

__ أولا موقع الحمله ومنه نقدر نعرف كل حاجه وكمان كل واحد يضغط انه شارك فى الحمله

http://amrkhaled.net/newsite/nofitna/

مبارده من الدكتور عمرو خالد بمشاركه 6 مواقع من اهم المواقع على الانترنت وتهدف الحمله الى نبذ الفتنه والاخبار الكاذبه والتاكد من صحه اى خبر قبل نشره تفاصيل اكتر هنلاقيها فى الموقع

__ صور الحمله المطلوب وضعها على بروفايل الفيس بوك وفى المدونات

فيديوهات الاعلان عن الحمله وهم مهمه جدا جدا

الفيديو الاول

الفيديو الثانى

وأخيرا هى مبادره طيبه اتمنى كلنا كلنا نشارك فيها ومش هتخسرنا اى حاجه الا نشر بوست خاص للموضوع دا لان الجمله كلها تقوم على نشر وعى التصدى للفتنه واحنا لازم نكون اول ناس تدعوه للموضوع دا تحياتى واتمنى التجاوب من الجميع