أنا قلت والله مافى غير المدونة أقول فيها الموضوع دا أصل بجد ضايقنى هتقولوا ايه اللى ضايقك يامانوو سامعكم
ندخل بقى فى الحكاية ..........
كان ياماكان انا رايح الكلية الصبح ودخلت عشان أحضر المحاضرة مع دكتور انا عارف انى مش هفهم حاجة بس عشان الغياب
بقى وقعدت فى المحاضرة والدكتور مقضيها هذار وضحك وقاعد وسطنا ورا وبيتكلم هوا حلو انه يقعد جنبنا بس مش حلو أنه
يفضل طول المحاضرة يرغى فى كلام فاضى المهم بقى ياناس انا بس بحكى الموقف كاملا وتخيلوه كمشهد درامى طويل
الدكتور كان بيتكلم وسمعت ودنى ان ابنه مسافر كندا بعد شهر تمام والدكتور بيقول انه قال لأبنه ::
( لو استقريت هناك مترجعش تانى هنا خالص )
كررها مرتين انا بينى وبينكم سخنت ومقدرتش استنى يقولها ثالث مرة
رحت اذ فجاة مدور وشى وبدا الحوار.......
أنا:: وده صح ياكتور
اتصدم الدكتور لما اكتشف ان فى حد ممكن يرد عليه
الدكتور:: ايه اللى صح ياابنى
أنا :: ان الواحد يبعد عن بلده وميرجعلهاش تانى
الدكتور::لما تكون بلد زى دى اه ميرجعهاش تانى
انا:: يعنى حضرتك بتعلمه انه يهرب بقى من المشاكل اللى فى البلد
الدكتور:: قال لا مش بعلمه يهرب انا بقول يشوف مستقبله ودا من حقه
انا:: طبعا يشوف مستقبله لكن يرجع بلده تانى لانها ليها حق عليه حب الوطن بعد حبه لدينه
الدكتور:: انت شخص بيروقراطى واسكت بقى بس بس
يالهوىىىىىىىى الدكتور بتاعى بيقول عليا بيروقراطى عشان بحب بلدى انا هتجنن والله
حب البلد بقى روتين ياناس حب البلد بقى فى ا لاغانى بس اما الدكتور اللى بيعلمنى يقولى كدا اما احنا الطلبة نعمل ايه
الدكتور اللى اتعلم فى البلد دى وعاش فيها وعشان اخد المنحة 4 سنين من برا بيقول لابنه لو شفت نفسك كويس مترجعش تانى خالص اييييييييييييه خلاص انا هتجنن والله.....................
وقعد الدكتور المحترم يجكيلى عن ال4 سنين اما كان برا وبياخد الدكتوراه وازاى هناك بيحترموا الناس ومش عارف ايه
قعد يقولى عن مساوئ البلد وغيره وغيره وانا مقتنع بكل حاجة وحشة هنا بس مش لدرجة انى اهرب واهاجر واقول بشوف مستقبلى البلد دى ليها حق عليا وقلتله ان لازم اديها جزء من حقها وغلط انى اهرب واسيب كل حاجة ورا ظهرى
لقيته بيقولى دانت مش جاى من غير كشكول ازاى بقى بتقول الكلام دا....................
معرفش ايه العلاقة بس رديت عليه وقلتله اانا جاى من غير كشكول لانى عارف انى مش هستفيد منين انت بتقول لابن حضرتك
ميرجعش ومنين عايزنى اجى بكشكول وانت عراف ان التعليم هنا مش هيفيدنى بس دا برده ملوش علاقة بحب البلد
وكرر الكلمة الشهيرة (بس بس خلاص )...................
قلتله لو حضرتك بتقفل الحوار بالكلمة دى يبقى انا خلاص اقتنعت قدام الناس دى كلها
اما دكتور يقفل نقاش محترم بينه وبين طالب بكلمة (بس بس خلاص)
عايزنى أرد اقوله ايه قلتله وانا هسكت لانه فعلا مينفعش حوار.............
وطبعا قلب الدكتور الوش التانى وعمل فيها دكتور فى الكام دقيقة اللى فاضلين فى المحاضرة ومكلنيش ولا فكر يبصلى مش عارف ليه مع اختلاف الراى بين اى اثنين دا شىء وارد جدا انما طبعا مع الدكتور اللى بيقول حب الوطن بيروقراطية مفيش الكلام دا...........
انا قلت ا للى جوايا لانى بجد مفروس من يوميها ولو انا غلطان فى حاجة حد يقولى والله انا قلت ا لحوار زى ماكان
وان كان حب الوطن بيروقراطية حد يقولى بقى........................
هناك 13 تعليقًا:
بيقول عليك بيروقراطى كويس انه مقالش عليكى برجوازى ديكالتى متحذلق
بص يابنى خلاصة القول انت بصراحة افحمته بس كان ناقص تقوله يادكتور الجيل بتاع حضرتك اللي خد خير البلد قولي دلوقتى فين المنح للخارج فين الشغل بسهولة فين العيشة السهلة فين حاجات كتير البلد اللي مش عجباك صرفت عليك بره عشان خاطر تيجى تقول عليها كده مهو فعلا هو ده الابن البار
والبلد مش هتستفيد من ابن حضرتك كتير ومش محتاجاه لانها مشافتش من حضرتك استفادة اصلا غير كل خير
وحسبي الله ونعم الوكيل في البشر دول
فعلا يستاهلو يعلمو الشباب ويبقو قدوتهم
فرحات افندى براقع
>>>>>>>>>>>>>>>>>
لا هوا مش فاهم يعنى ايه خير البلد اصلا
ولا عارف هناك احسن ولا هنا اصلح كل اللى يعرفه ان هناك كان مرتاح ومفيش وجع دماغ وبيقولى دانا حتى متعبتش وانا هناك استغفر الله العظيم يارب
على رأيك مش هيفيدوا البلد كتيرولا هوا ولا ابنه بس اللى غايظنى انه دكتور جامعة محترم وبيدرس لطلبة المفروض أنهم جيل جاى للبد عشان يصلحها
نورتنى ياعم فرحات كالعادة وتقبل احترامى
السلام عليكم ورحمة
الله تعالى وبركاته
الحمد لله انه مخدش اسمك
وعملك (عبرة لمن لا يعتبر)
للاسف كتير من اساتذة الجامعة
يروا انفسهم والعياذ بالله:آلهة!
عارف وممكن اوى
لما حتكون اب إن شاء الله
تطلب من ابنك نفس الكلام
إن بقى الوضع فى بلدنا مثل ما هو:(
مانو معلش انا كتبت
تعليق على موضوع قديم
عندك:اوعى ثم اوعى ثم اوعى
مااااااااااااااتردش عليه
ازعل :(:(:(:(:(:(
norahaty
<<<<<<<<
لا لا كتير عليا تعليقات هنا وتعليق كمان فى مكان تانى منورانى والله
أفولكا ان بقى تعرفى انا كان نفسى ياخد اسمى او يقولى تعالى نروح للعميد مثلا اصل انتى مش واخدة بالك انه غلط انه يتلكم فى حاجة زى دى فى المحاضرة اصلا
بس بجد انا عن نفسى معتقدش انى ممكن أقول لابنى كدا اصل فى فرق بين انى اقول لابنى شوف حياتك برا وكون مستقبلك وتعالى او انى اقوله افضل هناك طول عمره لا طبعا مينفعش يفضل طول عمره بلده ليها حق عليه
نورتينى بجد واطمنى رديت على تعليقك فى الموضوع التانى
السلام عليكم
معنى رد الدكتور ببس بس خلاص انه مايعرفش حتى يعنى ايه احترام وجهة نظر الآخرين والمفروض انه بتعامل مع جيل حيتخرج عنده طموح وآمل انه يبقى احسن من جيل الدكتور نفسه والبلد تتقدم بيه .. مسألش نفسه ليه هو رجع مصر مع انها مايتعشش فييها .. لأنها بلده ومهما اتغرب حيرجع لها لانه في اي بلد غيرها حيتعامل مواطن درجة تانية .. على فكرة غالبية دكاترة الجامعة في مصر غير مؤهلين للتدريس نهائيا .
الله يوفقك في كل حياتك بالنجاح والسعادة
تقبل مروي في مدونتك الرائعة
أطيب تحية
your blog is very fine
حياة
>>>>
مانا عشان كدا أول اما قالى بس خلاص قلتله انا اقتنعت كدا عشان كنا هندخل فى جدال وانا اكره الجدال انا احب النقاش المحترم مهما كانت وجهات النظر ومعتقدش انه ممكن يفكر بطريقة انه رجع مصر لأنها بلده والدليل انه مش عارف واجبه تجاها ايه والكارثة فى كل دا انه دكتور جامعة
نورتينى ياحياة واتمنى التواصل الدائم وتقبلى احترامى
مدونتك جميله و مغزى التيييييت عميق جدا :))
خد بالك بقى لحسن الدكتور ده ياخد اٍسمك و يستقصدك كما هو متبع حتى من أيام الفراعنه ..
لا تعارض و لا تجادل يا أخ مانو بغير طائل و لا فائده هو ده اللى عاوزين يعلموه للأجيال كلها .. للأسف الشديد
تقبل تقديرى و تحياتى
عمرو
<<<<<<
أولا نورتنى بجد وشرف ليا زيارتك واتمنى تكرارها دائما يارب
يأخد اسمى والله عادى هيعمل ايه يسقطنى عشان بقول رأيى مش احسن ماينجحنى عشان بنافقه احنا بنتناقش وهما لو عايزين يناقشونا ييجوا مش عايزين يبقى برده مفيش حد هيمنعنا نقول رأينا
نورتنى مرة تانية واتمنى التواصل الدائم
اسجل اعجابى بموقفك وجرائتك
انا زيك لما اسمع كلام ميعجبنيش مبسكتش حتى لو من الريس مش من حتة دكتور
هو شاكله دكتور على قده معرفش انا ايه الدكاترة اللى معندهمش حجة المناقشة دول
ربنا يكون فى عونك
arsenalwy
<<<<<<<<<
احنا لازم على الأقل نتكلم ونرد وننوضح رأينا حتى لو قدام مين طالما بنتكلم بوجهة نظر وطريقة نقاش محترمة
بشكرك على تشريفى المدونة واتمنى التواصل
إرسال تعليق